INAMA NJYANAMA Y’AKARERE YEMEJE INGENGO Y’IMARI YA 2012-2013
Ngabo abajyanama b'akarere ka Nyamagabe
Guverineri Munyantwali,intumwa ya Minisiteri y'imari,abahagarariye njyanama z'imirenge,abanyamabanga nshingwabikorwa b'imirenge n'utugari hamwe n'abafatanyabikorwa nabo bari bahari
Inama njyanama y’akarere ka Nyamagabe kuri uyu wa Gatatu taliki 27 Kamena 2012 yemeje ingengo y’imari izakoreshwa n’ako karere mu mwaka w’ingengo y’imari 2012-2013 . Iyi ngengo y’imari ingana na 10,641, 861,872 Frws .Igice kinini cy’aya mafaranga kigizwe n’ingengo y’imari isanzwe kuko ari 7,270,251,537.Mu ngengo y’imari isanzwe harimo imishahara y’abakozi yihariye hafi ½ cyayo(3,706,080,141 ) hamwe no kugura no kwishyura ibintu n’ibikoresho bitandukanye mu gihe ingengo y’imari y’amajyambere nayo ingana na ½ cy’ingengo y’imari isanzwe kuko ari 3,344,610,335 frws.
Mbere yo kwemeza iyi ngengo y’imari,abagize inama njyanama y’akarere ka Nyamagabe babanje kugezwaho n’ababishinzwe uko ingengo y’imari y’umwaka ushize yakoreshejwe,bishimira ko 97,4% by’amafaranga yose yabashije kuboneka yakoreshejwe,icyakora ayasigaye nayo akaba azaherwaho mu ngengo y’imari yemejwe none kuko ngo yahariwe ibikorwa byambukiranya iyi myakaya 2 y’ingengo y’imari.Biteganyijwe ko aya mafaranga yose azaturuka mu nzego bwite za Leta mu gihe akarere ko kihaye intego kwiyinjiriza 500,000,000frws
Uretse iyi ngengo y’imari ,abagize inama njyanama y’akarere ka Nyamagabe bunguranye n’ibitekerezo ku mihigo ya 2012-2013 aho bemeje ko izibanda ku bikorwa binini byambukiranya imyaka ariko bikaba bitegerejweho impinduka nziza ku buzima bw’abaturage nkuko babigiriwemo inama na Guverineri w’intara y’amajyepfo Munyantwali Alphonse wari umushyitsi muri iyi nama.
Nubwo bikiri agateganyo, ku mihigo 27 iteganyijwe 17 yerekeranye n’ubukungu mu gihe imibereho myiza,imiyoborere myiza n’ubutabera byo bifite imihigo 10.
Akarere kihaye ibipimo byo hejuru mu kongera ubuso bw’icyayi n’ikawa ,imyumbati,ibirayi n’ingano mu gihe hagaragaramo n’ibintu byari bitegerejwe nko gutunganya ikimoteri mu mujyi wa Nyamagabe ,kubaka ingomero nto z’amashanyarazi mu mirenge ya Nkomane na Mugano isanzwe itazi uko umuriro w’amashanyarazi usa,guteza imbere imyuga no kubaka ahantu ntangarugero abanyabukorikori batandukanye bazajya bakorera n’ibindi abayobozi b’akarere ka Nyamagagabe bemeza ko bizagira uruhare mu kuvana abaturage bagera ku 13,000 mu nsi y’umurongo w’ubukene.
By Jean Pierre K.
