Ibirori byo gutangiza kuzigamira ubwisungane mu kwivuza (Mutuelle de sante) 2018-2019 byitabiriwe n'ibyiciro bitandukanye by'abagize uruhare rufatika mu kuzamura ubwisungane mu kwivuza 2017-2018 mu murenge wa Gatare aho nibura abaturage bangana na 89% babashije kwiyishyurira ubwisungane mukwivuza, babinyujije mu kwizigama mu matsinda no gukorera ku mihigo.Abashyitsi baje kwifatanya n'abaturage ba Gatare akaba ari Bwana NGABONZIZA Jean Bosco Division Manager w'Akarere ka Nyamagabe,Brigade Commander Col.Theodomir GAHIZI,Umuyobozi wa Police Station ya Musebeya,n'Umukozi ushinzwe Ubwisungane mu kwivuza mu karere ka Nyamagabe.

 

Umunyamabanga Nshingwabikorwa w'umurenge wa Gatare yafashe umwanya wo kugaragaza ishusho y'uko utugari twarushanyijwe mu kweza umuhigo w'UBWISUNGANE MU KWIVUZA 2017-2018 muri aya mezi atandatu ashize ,hatangwa n'ibihembo ku tugari twahize utundi tukagira 100% muri uyu muhigo ari two , akagari ka Gatare kagize 100% mu kwezi kwa Nzeri 2017 kakaba karegukanye n'igikombe, na Bakopfu yagize 100% mu kwezi k'Ugushyingo 2017. Aba bose bakaba barambitswe amakamba y'ishema n'agaciro kubera bagize uruhare rugaragara mu kubungabunga ubuzima bw'abaturage kandi bakemera kuba urugero rw'ibishoboka. Umudugudu wa Gashasha ho mu kagari ka Gatare wahize iyindi mu ntara y'amajyepfo ndetse ukohererezwa ibihembo na Nyakubahwa Guverineri w'Intara y'Amajyepfo , nawo wongeye kwegukana ibihembo byo kuba uwambere mu midugudu 25 igize Umurenge wa Gatare kuko wagize 100% muri Nyakanga 2017,ubu abaturage bawo bakaba bari kuzigamira MUSA ya 2018-2019 harimo n'abamaze kwishyura.

Abazaririye mu kwesa umuhigo w'ubwisungane mu kwivuza bo baragawe, bakaba bariyemeje kugaragaza impinduka nziza muri 2018-2019.

Abanyamabanga Nshingwabikorwa bose bagize Umurenge wa Gatare basinyanye umuhigo wa MUTUELLE 2018-2019 na Bwana Nshimyumuremyi Valens, Perezida w'Inama Njyanama y'Umurenge wa Gatare,biyemeza ko ku itariki ya 31/12/2018 bazaba baramaze gufasha abaturage kwishyura ubwisungane mu kwivuza 2018-2018 ku gipimo cya 100%.

 

 

HAKIZIMANA Jean Bosco

Umukozi ushinzwe uburezi mu murere wa Gatare,

Akarere ka Nyamagabe/ Tel; 0785578606/0728278606

Share Button