Kuri uyu wa 11 Mutarama 2024, Abadepite bagiranye ibiganiro n'Ubuyobozi bw'Akarere hamwe n'abagize ibindi byiciro by’Abayobozi bitandukanye mu Karere byibanze ku gusesengurira hamwe igipimo cy’ishyirwa mu bikorwa ry’Ingengo y’Imari y'Akarere y'Umwaka wa 2023-2024 mu mezi 6 abanza, gusuzuma imbogamizi zatuma imikoresherezwe yayo itihuta no kuzishakira ibisubizo. Iri tsinda ry’Abadepite ryari rigizwe na Hon. NYIRABAZAYIRE Angelique na Hon. UWAMAHORO Berthilde babarizwa muri Komisiyo y’Ingengo y’Imari n’Umutungo by’Igihugu mu Nteko Ishinga Amategeko.

Nyuma y’ibiganiro, baherekejwe na Perezida w'Inama Njyanama y'Akarere Madame Clotlide UWAMAHORO n'Umuyobozi w'Akarere Wungirije Ushinzwe Iterambere ry'Ubukungu Bwana Thaddée HABIMANA, aba Badepite basuye ibikorwa by'imishinga y'iterambere birimo umuyoboro w'amashanyarazi wa Bushigishigi-Rambya-Kizimyamuriro uri kubakwa mu Murenge wa Buruhukiro n'ubworozi bw'inkoko n'ingurube buherereye mu Murenge wa Uwinkingi, Umushinga Prism uteramo inkunga abaturage.