Kuri uyu wa 25, Umuyobozi w’ Akarere Bwana Hildebrand NIYOMWUNGERI yakiriye Itsinda ry' Abadepite baturutse muri Komisiyo ya Politiki, Uburinganire n' Ubwuzuzanye bw' Abagore n' Abagabo mu Iterambere ry' Igihugu bari baje mu gikorwa cyo kumenya no kugenzura imitangire ya Serivisi z’ itangwa ry’ ikarita Ndangamuntu mu Mirenge y' Akarere ka Nyamagabe.

Nk’ uko babyemererwa n’ Itegeko Nshinga rya Repubulika y’ u Rwanda, Abagize Inteko Ishinga Amategeko Imitwe yombi bagenzura ibikorwa bya Guverinoma binyuranye.

Ni muri urwo rwego Itsinda ry' Abadepite bari baturutse muri Komisiyo ya Politiki, Uburinganire n' Ubwuzuzanye bw' Abagore n' Abagabo mu Iterambere ry' Igihugu ryari riyobowe na Hon. IZABIRIZA Marie Médiatrice ryasuye Akarere ka Nyamagabe mu rwego rwo kumenya uko Serivisi z’ imitangire y’ Ikarita Ndangamuntu zikorwa, uko zitabirwa n’ Abaturage, imbogamizi zirimo n’ uko zigenda zikemurwa.

Umuyobozi w’ Akarere Bwana Hildebrand NIYOMWUNGERI yabwiye aba Badepite ko Serivisi z’ Indangamuntu zitangwa neza mu Mirenge yose igize Akarere ariko hagenda hagaragara imbogamizi zirimo iyo kuba hari amafoto afatwa n’ Abakozi babishinzwe, Ikigo cy’ Igihugu gishinzwe Indangamuntu NIDA kikayasubirishamo.

Gusa Meya NIYOMWUNGERI avuga ko iki kibazo ahanini giterwa nuko aba Bakozi baba ari bashya ariko ku bufatanye na NIDA iki kibazo kigenda kivugutirwa umuti binyuze mu kubaha amahugurwa.

Mbere yo gusoza uruzinduko bagiriraga mu Karere, aba Badepite bo muri Komisiyo ya Politiki, Uburinganire n' Ubwuzuzanye bw' Abagore n' Abagabo mu Iterambere ry' Igihugu basuye Imirenge ya Kitabi na Gasaka mu rwego rwo kureba uko Serivisi z' Ikarita Ndangamuntu zikorwa.

Muri rusange bashimye uko Akarere kongereye imibare y’ abafotorwa kugira ngo babone Indangamuntu.