Mu rwego rwo kwigiranaho uko imibereho y’ Impunzi ziba mu Nkambi n’ abaturanye na zo yarushaho kuba myiza, itsinda ry’ Abakozi b’ Akarere bakorera ku rwego rw’ Akarere no ku rw’ Imirenge, Abakozi b’ Inkambi ya Kigeme na bamwe mu Baturage bo mu Mirenge yegeranye n’ iyi Nkambi bakoreye Urugendoshuri rw’ iminsi 4 mu Turere twa Gatsibo na Kirehe na two dufite Inkambi z’ Impunzi.

Kuva ku wa 20 kugeza ku wa 23, iri tsinda ryari riyobowe n’ Umuyobozi w’ Akarere Wungirije Ushinzwe Imibereho Myiza y’ Abaturage Madame Agnès UWAMARIYA ryasuraga ibikorwa binyuranye byo muri utu Turere byiganjemo ibihuriweho n’ Impunzi ziba mu Nkambi ndetse n’ Abanyarwanda baturanye na zo.

Mu Karere ka Gatsibo gafite Inkambi ya Nyabiheke, iri tsinda ryasuye igishanga cya Nyabicwamba gifite ubuso bwa Hegitari 29 giherereye mu Murenge wa Gatsibo, kikaba gihingwamo ibigori na soya na Koperative Duhuzimbaraga ihuriweho n’ Impunzi ziba muri iyi Nkambi ndetse n’ Abanyarwanda baturanye na yo.

Muri uyu Murenge kandi iri tsinda ryasuye Koperative y’ ubudozi bw’ imyenda yitwa Koperative Twitezimbere Abadozi Gatsibo(KOTAG) na yo ihuriweho n’ Impunzi zo muri iyi Nkambi ya Nyabiheke ndetse n’ Abanyarwanda baturanye na yo.

Mu Karere ka Kirehe gafite Inkambi y’ Impunzi nini kurusha izindi mu Rwanda ari yo ya Mahama, itsinda ry’ Abakozi b’ Akarere bakorera ku rwego rw’ Akarere no ku rw’ Imirenge, Abakozi b’ Inkambi ya Kigeme na bamwe mu Baturage bo mu Mirenge yegeranye n’ iyi Nkambi basuye ibikorwa by’ Ubuhinzi n’ Ubworozi na byo bihuriweno n’ Impunzi ndetse n’ Abanyarwanda baturanye na zo.

Ubwo ni Ubuhinzi bw’ ibihumyo bukorwa n’ Abakobwa batewe inda zitateganyijwe n’ Ubworozi bw’ inka zisaga 100.

Mu bindi iri tsinda ryasuye harimo Koperative KOIRWI ihinga ibigori bisimburana n’ ibishyimbo na Rwimbogo Dairy Cooperative ifite ikusanyirizo ry’ amata, zombi zikaba ari izo mu Murenge wa Rwimbogo, mu Karere ka Gatsibo.

Ryasuye kandi Amatorero y’ Umudugudu akora neza. Ayo ni iry’ Umudugudu wa Bwiza, mu Kagari ka Mpundwa n’ iry’ Umudugudu wa Gikuye, mu Kagari ka Rubira. Yombi ni ayo mu Murenge wa Gitoki.

Umuyobozi w’ Akarere ka Gatsibo Gasana Richard wakiriye iri tsinda, yarisobanuriye imikorere n’ akamaro k’ Icyumba Ntangamakuru (Situation Room) ndetse n’ uburyo babika inyandiko hifashishijwe uburyo bw’ ikoranabuhanga.

Umuyobozi w’ Akarere Wungirije Ushinzwe Imibereho Myiza y’ Abaturage Madame Agnès UWAMARIYA wari uyoboye iri tsinda yashimye uburyo Ubuyobozi bw’ Uturere twombi twabakiriye.

Yavuze ko hari byinshi bigiye muri uru Rugendoshuri ndetse biteguye kubisangiza abO basize, ariko na we abasaba ko baza kwigira ku dushya two mu Karere ka Nyamagabe.