Kuri uyu wa 03 Gicurasi 2024, Umuyobozi w’Akarere, Bwana Hildebrand NIYOMWUNGERI yakiriye Abanyamuryango ba Unity Club Intwararumuri basuye Urwibutso rwa Jenoside rwa Murambi ruherereye mu Murenge wa Gasaka, mu gikorwa cyo kwibuka ku nshuro ya 30 Jenoside yakorewe Abatutsi mu 1994.

Mu ijambo rye, Umuyobozi Wungirije wa Mbere wa Unity Club Intwararumuri, Honorable Kayisire Marie Solange, yagaragaje ko Abanyarwanda bakwiye kumenya, gusobanukirwa neza no kurinda amateka yabo; guhora basubiza amaso inyuma bakareba imiyoborere mibi yaranze Igihugu ari na yo yakigejeje kuri Jenoside yakorewe Abatutsi mu 1994, bakamaganira kure icyo ari cyo cyose cyakurura amacakubiri n’umwiryane mu Banyarwanda.

Aha yashimangiye uruhare rw’ubuyobozi agira ati: “Kwibuka nk’abayobozi, ni inshingano zacu kugira ngo dukomeze guharanira imiyoborere myiza yimakaza Ubumwe n’Ubudaheranwa bw’Abanyarwanda."

Urwibutso rwa Jenoside rwa Murambi basuye, rufite umwihariko wo kugaragaza uruhare rw’ubutegetsi bubi mu mateka mabi y’itotezwa n’ubwicanyi byakorewe Abatutsi, bikagera kuri Jenoside yakorewe Abatutsi mu 1994.