Kuri uyu wa 13 Werurwe 2024, Umuyobozi w'Akarere Bwana Hildebrand NIYOMWUNGERI yakiriye itsinda rya ba Ofisiye Bakuru biga mu Ishuri Rikuru rya Polisi riherereye mu Karere ka Musanze bagiriye urugendoshuri mu Karere. Uru rugendoshuri rwari rufite insanganyamatsiko igira iti:" Guteza imbere umuco wo gukumira icyaha binyuze mu bufatanye n'Abaturage", rwari rugamije gufasha Abanyeshuri b’iri Shuri gusobanukirwa ingamba zifatwa mu gukumira no kugabanya ibyaha.

Nyuma yo kwakirwa n’Umuyobozi w’Akarere, basuye Umurenge wa Gasaka bagirana ibiganiro n'Abafatanyabikorwa mu gucunga umutekano barimo; Komite z'Abaturage mu kwicungira umutekano (CPCs), Urubyiruko rw’Abakorerabushake mu gukumira ibyaha, Imboni z'impinduka, Amatsinda yo kurwanya ibyaha n'abandi. Abanyeshuri bo mu Ishuri Rikuru rya Polisi bakoreye urugendoshuri mu Karere ka Nyamagabe, bakomoka mu bihugu 9 by’Afurika ari byo; Botswana, Kenya, Lesotho, Malawi, Namibia, Somalia, Sudani y’Epfo, Tanzania n’u Rwanda rwabakiriye. Mu gihe cy’umwaka bamara biga amasomo y’icyiciro cya 12, ba Ofisiye Bakuru mu nzego zishinzwe iyubahirizwa ry’amategeko, bahabwa amasomo akubiye mu bice bitandukanye birimo amasomo y’Icyiciro cya gatatu cya Kaminuza mu bijyanye n'amahoro no gukemura amakimbirane, ayerekeranye n’ibikorwa byo kubungabunga amahoro n’ubumenyi ku miyoborere.