Kuri uyu wa 23 Mutarama 2025, itsinda ry'Abasenateri ryari rigizwe na Honorable MURANGWA NDANGIZA Hadija na Honorable CYITATIRE Sosthène ryasuye Akarere mu rwego rwo kureba uko amavuriro y'ibanze aha serivisi abayagana n’uko imbogamizi zihari zavanwaho.

Baherekejwe n'Umuyobozi w'Akarere, Bwana Hildebrand NIYOMWUNGERI na bamwe mu bagize inama y’Umutekano Itaguye y’Akarere, basuye ivuriro ry'ibanze rya Mujuga riherereye mu Murenge wa Kitabi n’irya SUBUKINIRO riherereye mu Murenge wa Uwinkingi.

Ku ivuriro ry’ibanze rya Mujuga, bagiranye ibiganiro n'abajyanama b'ubuzima ku bijyanye n’uko bafasha abaturage kubona serivisi z’ubuzima. Ku ivuriro ry’ibanze rya Subukiniro, bagiranye ibiganiro n’abaturage byibanze ku kubasobanurira gahunda za Leta zitandukanye.

Abaturage b'Umurenge wa Uwinkingi bavuze ko bishimira serivisi bahabwa ku mavuriro y'ibanze ariko basaba ko zongerwa ndetse n'umubare w'abaganga ukiyongera. Honorable CYITATIRE Sostène yababwiye ko Leta yihaye gahunda yo kongera serivisi zitangirwa mu mavuriro y'ibanze ndetse n'umubare w'abaganga bazikoramo ukiyongera.

Muri iyi gahunda, amwe mu mavuriro y’ibanze ari kwagurwa harimo n’irya Subukiniro ndetse hakaba harasubijweho amasomo y’ubuforomo n’ububyaza mu mashuri yisumbuye.

Kuva ku itariki 21 kugeza ku wa 30 Mutarama 2025, Abasenateri bose basuye abaturage bo mu Turere twose n’Umujyi wa Kigali mu rwego rwo kureba ibikorwa mu guteza imbere amavuriro y’ibanze abegereye (Poste de Santé) no gusesengura ibibazo biyagaragaramo. Iki gikorwa kandi cyari kigamije kureba uruhare rw’inzego za Leta, abaturage n’abafatanyabikorwa mu guteza imbere ayo mavuriro, kureba imbogamizi zigaragara mu kuyateza imbere n’ingamba ziteganyijwe mu kuzikemura.