Kuri uyu wa 14 Werurwe 2024, Umuyobozi w'Akarere Bwana Hildebrand NIYOMWUNGERI yasoje amahugurwa yahabwaga Komite Nyobozi, Komite Ngenzuzi n'Abakozi ba Koperative y'abatwara abagenzi kuri moto bo mu Karere ka Nyamagabe yitwa UTAMONYA (Umurava Taxi Moto Nyamagabe). Muri aya mahugurwa, Abayobozi ba UTAMONYA bahawe ikiganiro ku micungire y’umutongo wa Koperative no ku byaha ku bikorwa hifashishijwe Abamotari.

Mu bindi biganiro Abayobozi ba Koperative UTAMONYA bahawe harimo icyagarutse ku mpinduka zo gutwara abagenzi kuri moto cyatanzwe na Dr. Patrice Mugenzi, Umuyobozi Mukuru w’ Ikigo cy'Igihugu gishinzwe guteza imbere Amakoperative (RCA) n’icyagarutse ku myitwarire y'Abamotari cyatanzwe na SP J. BATSINDA, Umuyobozi Mukuru ushinzwe Abamotari ku rwego rw'Igihugu. Abitabiriye aya mahugurwa bizeje Ubuyobozi ko bagiye gukorana umurava n'ubunyangamugayo mu kazi kabo.

Ku wa 20 no ku wa 21 Gashyantare 2024, ni bwo abatwara abagenzi kuri moto bazwi nk’Abamotari bo mu Karere ka Nyamagabe batoye Abayobozi ba Koperative yabo. Aya matora yaje nyuma yuko mu mwaka ushize wa 2023, Koperative z’Abamotari zo mu Karere ka Nyamagabe kimwe n’ahandi hose mu Gihugu ziseshwe ku bushake bw’Abanyamuryango bazo bavugaga ko aho kubateza imbere zibagusha mu bihombo.