Perezida w’Inama Njanama y’Akarere, Madame Clotilde UWAMAHORO, Umuyobozi w'Akarere, Bwana Hildebrand NIYOMWUNGERI ari kumwe n'abandi bagize Komite Nyobozi y'Akarere, abayobozi b'amashami mu Karere n'abagize Komite Mpuzabikorwa y’Ihuriro ry’Abafatanyabikorwa mu Iterambere ry’Akarere (JADF Nyamagabe), bitabiriye amahugurwa y'iminsi 2 yibanze kuri gahunda yo gufasha abaturage b'Akarere kwikura mu bukene.

Aya mahugurwa yatangiye kuri uyu wa 17 agasozwa kuri uyu wa Gashyantare 2025, yateguwe n’Umushinga BRAC- UPGI agamije gufasha Akarere mu kwihutisha gahunda yo kuvana mu bukene mu buryo burambye abaturage bayirimo.

Atangiza aya mahugurwa, Meya NIYOMWUNGERI yashimiye by'umwihariko Ubuyobozi bwa BRAC-UPGI ku bufatanye udahwema kugaragariza Akarere ibinyujije mu mishinga ifasha abaturage kwikura mu bukene.

Umuyobozi wa BRAC-UPGI mu Rwanda, Bwana MUHIRE Jean Claude yashimye ubufatanye bafitanye n'Akarere muri gahunda yo gufasha umuturage kwiteza imbere, yizeza ko bazakomeza gufatanya muri gahunda zose ziganisha ku iterambere ry'Akarere by'umwihariko muri gahunda yo kuvana abaturage mu bukene (Graduation) Akarere ka Nyamagabe kimirije imbere.