Abayobozi batandukanye basabwe gufata iya mbere mu kuzamura igipimo cy’uko abaturage babona imiyoborere n’imitangire ya serivisi mu Karere ka Nyamagabe, ibi bakabikora bageza serivisi nziza ku muturage.

Ibi abayobozi bahagarariye ibyiciro by’abaturage bitandukanye guhera ku mudugudu kugeza ku Murenge babisabwe mu nama zabaye zigamije kubasobanurira ibyavuye mu bushakashatsi bw’uko abaturage babona imiyoborere n’imitangire ya serivisi (CRC) bw’Ikigo Gishinzwe Imiyoborere (RGB) bwo muri 2022.

Ni inama zakozwe ku buryo abayobozi b’Imirenge yegeranye bahuriraga hamwe aho ku wa 09 Werurwe abo mu Mirenge ya Gasaka, Kamegeri, Cyanika, Mbazi na Kibilizi bahuriye mu Murenge wa Gasaka. Iyi nama yayobowe na Perezida w’Inama Njyanama y’Akarere ka Nyamagabe, Uwamahoro Clothilde ari hamwe n’Umuyobozi w’Akarere Wungirije Ushinzwe Iterambere ry’Ubukungu, Habimana Thaddée.

Ku wa 11 Werurwe abayobozi bo mu Mirenge ya Kaduha, Musange, Mugano na Kibumbwe bahuriye mu Murenge wa Kaduha. Iyi nama yayobowe na Perezida w’Inama Njyanama y’Akarere ka Nyamagabe, Uwamahoro Clothilde ari hamwe n’Umunyamabanga Nshingwabikorwa w’Akarere, Ngarambe Alfred ndetse n'Umuyobozi w'Ishami rishinzwe ubushakashatsi muri RGB, Dr. Félicien Usengumukiza.

Ku wa 13 Werurwe inama nk’iyi yabereye mu Murenge wa Tare ihuza abayobozi bahagarariye ibyiciro bitandukanye mu Murenge wa Tare, Kitabi na Uwinkingi. Iyi nama yayobowe n’Umuyobozi w’Akarere ka Nyamagabe, Niyomwungeri Hildebrand.

Naho ku wa 16 Werurwe iyi nama yabereye mu Murenge wa Buruhukiro hahurira abayobozi bo mu Mirenge ya Gatare, Buruhukiro, Nkomane, Mushubi na Musebeya. Inama yayobowe n’Umuyobozi w’Akarere ka Nyamagabe.

Nyuma y’uko abitabiriye ibiganiro bagaragarijwe birambuye ishusho y’uko abaturage babona imiyoborere n’imitangire ya serivisi mu Karere ka Nyamagabe habayeho kuyiganiraho ndetse no kwiyemeza guhindura ku buryo ubutaha Akarere kazaba gahagaze neza.

Ibi biganiro byateguwe ku bufatanye na GIZ Rwanda