Kuri uyu wa 12 Mutarama 2025, Amagaju FC yatsindiye APR FC kuri Stade Mpuzamahanga ya Huye 1-0, mu mukino w’umunsi wa 15 wa shampiyona, akora amateka yo kuyitsinda bwa mbere. 

Ni umukino watangiye uryoheye ijisho mu gice cya mbere. Mu gice cya mbere cyarangiye ari 0-0, Amagaju FC nta buryo bukomeye yabonye imbere y’izamu rya APR FC, mu gihe APR FC yabonye uburyo bubiri. 

Umunya-Ghana Dauda Yussif ku munota wa 32, yacenze abakinnyi batatu b’Amagaju FC mu kibuga hagati maze aha umupira mwiza Ruboneka Bosco wari mu rubuga rw’amahina arebana n’izamu, ariko ntiyashobora kuriteramo ahubwo aha umupira Tuyisenge Arsene, wateye mu izamu Amagaju FC akawushyira muri koruneri.

Ku munota wa 56, ni bwo Ndayishimiye Edouard yatsindiye Amagaju FC igitego cya mbere. Ku munota wa 57, APR FC yahise igerageza uburyo bukomeye ku ishoti Ruboneka Jean Bosco yatereye hanze y’urubuga rw’amahina, ariko umunyezamu Twagirumukiza Clement awushyira muri koruneri. 

APR FC yari igiye ku gitutu yahise isimbuza ikuramo Dushiminana Olivier na Niyibizi Ramadhan, ishyiramo Mahmadou Lamine Bah na Kwitonda Alain Bacca. APR FC yakomeje gushyiramo imbaraga zatuma yishyura cyangwa ikabona amanota, ariko birangira ari igitego 1 cy’ikipe ya Amagaju FC ku 0 bwa APR FC.

Iyi ntsinzi Amagaju FC yakuye kuri APR FC, ni intsinzi y’inyongera kuko yahuriranye n’umwaka w’ibirori byo kwizihiza isabukuru y’imyaka 90 Amagaju FC amaze avutse, kuko yashinzwe mu 1935.