Mu Mugoroba w’Ikiriyo wabereye ku Rwibutso rwa Jenoside rwa Cyanika, Perezida w'Inama Njyanama y'Akarere, Madame Clotilde UWAMAHORO yabwiye abawitabiriye ko Igihugu dufite gifite ikiguzi gikomeye cyatanzwe n'abitanze bagahagarika Jenoside yakorewe Abatutsi mu 1994.

Kuri uyu wa 03 Gicurasi 2025, ni bwo ku Rwibutso rwa Jenoside rwa Cyanika ruherereye mu Murenge wa Cyanika, ni bwo hari bubereye umuhango wo kwibuka ku nshuro ya 31 Jenoside yakorewe Abatutsi mu 1994.

Bitewe nuko hari bushyingurwe mu cyubahiro imibiri y’abazize Jenoside yakorewe Abatutsi mu 1994 igera kuri 51 yabonetse n’indi ibiri yimuwe, uyu muhango wabanjirijwe n’Umugoroba w’Ikiriyo witabiriwe na Perezida w’Inama Njyanama y’Akarere, Madame Clotilde UWAMAHORO, Umuyobozi w’Akarere, Bwana Hildebrand NIYOMWUNGERI, Umuyobozi w’Akarere Wungirije Ushinzwe Imibereho Myiza y’Abaturage, Agnès UWAMARIYA, abagize Inama y’Umutekano Itaguye y’Akarere n’abandi.

Perezida w’Inama Njyanama y’Akarere, Madame UWAMAHORO wari Umushyitsi Mukuru muri uyu muhango yabwiye abawitabiriye ko Igihugu dufite gifite ikiguzi gikomeye cyatanzwe n'abitanze bagahagarika Jenoside yakorewe Abatutsi mu 1994.

Yagize ati: “Iki Gihugu dufite ubu, cyatanzweho ikiguzi gikomeye n’abahagaritse Jenoside yakorewe Abatutsi mu 1994. Rero dukwiye gusigasira ubumwe bwacu tukaburinda icyabuhungabanya.”

Urwibutso rwa Jenoside rwa Cyanika, ruruhukiyemo imibiri y’abazize Jenoside yakorewe Abatutsi mu 1994 isaga ibihumbi 40.