Honorable Depite UWUMUREMYI Marie Claire yasabye ababyeyi bo mu Karere ka Nyamagabe kubwiza abana babo ukuri ku bijyanye n’amateka ya Jenoside yakorewe Abatutsi mu 1994 kuko nta yindi nyiturano igihugu kibategerejeho itari iyo kukirerera neza.

Ibi Honorable UWUMUREMYI yabibasabye kuri uyu wa 13 Mata 2024 ubwo yifatanyaga n’ubuyobozi hamwe n’abaturage b’Akarere mu muhango wo kwibuka ku nshuro ya 31 Jenoside yakorewe Abatutsi mu 1994 wabereye ku Rwibutso rwa Jenoside rwa Musange.

Yagize ati: “Babyeyi, mugomba kubwiza abana banyu ukuri ku bijyanye n’amateka y’igihugu cyacu by’umwihariko aya Jenoside yakorewe Abatutsi mu 1994 kuko nimutayababwira bazayumvira aho batagomba kuyumvira, musange bayatwaye macuri. Rero, nimutinyuke mubabwize ukuri.”

Yasabyekandi urubyiruko guhangana n’abapyobya Jenoside yakorewe Abatutsi bifashishije imbuga nkoranyamabaga.

Umuyobozi w'Akarere, Bwana Hildebrand NIYOMWUNGERI yasabye abitabiriye uyu kutihanganira ushaka gukerensa ubumwe n'ubudaheranwa by'Abanyarwanda.

Yagize ati: "Jenoside yakorewe Abatutsi yatewe n'amacakubiri yimitswe na ba Gashakabuhake bagambiriye gusenya ubumwe bwacu.

Nyuma imaze guhagarikwa, hatanzwe ikiguzi gikomeye kugira ngo Abanyarwanda bongere babe umwe.

Iki kiguzi kirakomeye ku buryo tudashobora kwihanganira abashaka gukerensa ubumwe n'ubudaheranwa by'abanyarwanda.

Uyu muhango waranzwe n’ibikorwa byo kunamira Abatutsi bazize Jenoside yakorewe Abatutsi mu 1994 bajugunywe mu mugezi wa Mwogo, kunamira imibiri y'abazize Jenoside yakorewe Abatutsi mu 1994 isaga ibihumbi 26 iruhukiye mu Rwibutso rwa Jenoside rwa Musange no gushyingura mu cyubahiro indi 2 yabonetse.

Umuhango wo kwibuka ku nshuro ya 31 Jenoside yakorewe Abatutsi mu 1994 i Musange, byitabiriwe kandi na Perezida w'Inama Njyanama y'Akarere, Madame Clotilde UWAMAHORO, Umuyobozi w'Akarere Wungirije Ushinzwe Imibereho Myiza y'Abaturage, Madame Agnès UWAMARIYA, abagize Inama y'Umutekano Itaguye y'Akarere, Umunyamabanga Nshingwabikorwa w'Akarere, Bwana SAMVURA Valens n’abandi.