Kuri uyu wa 27 Nyakanga 2023, Nyakubahwa Guverineri w’ Intara y’ Amajyepfo Madame Alice KAYITESI yitabiriye Ukwezi kwahariwe gukemura ibibazo by’ Abaturage mu murenge wa Kitabi, afatanya n’ Umuyobozi w’ Akarere ndetse n’ Umuyobozi wa Polisi mu Karere mu kubyakira no kubikemura.

Ubwo yakiraga ibibazo by’ Abaturage byashyikirijwe Urwego rw’ Akarere ntibikemuke cyangwa se ntibanyurwe n’ ibisubizo bahawe yabibukije ko Ubuyobozi budakuraho icyemezo cy’ urukiko, anabasaba kujya banyurwa n’ imyanzuro iba yafashwe.

Yagize ati: “Mujye mudufasha, usibye na Guverineri nta n’ undi Muyobozi uwo ari we wese ukuraho umwanzuro w’ Urukiko. Umwanzuro w’ Urukiko ukurwaho n’ urundi Rukiko. Kandi mujye mugerageza kunyurwa n’ umurongo ibibazo byaba biba byarahawe”

Ukwezi kwahariwe gukemura ibibazo by’ Abaturage mu karere ka Nyamagabe, kuri uyu wa 27 Nyakanga 2023 kwakomereje no mu yindi mirenge.

Umuyobozi w’ Akarere Wungirije Ushinzwe Iterambere ry’ Ubukungu Bwana Thadee HABIMANA n’ Itsinda yari ayoboye bagukomereje mu murenge wa Uwinkingi, mu gihe Umuyobozi w’ Akarere Wungirije Ushinzwe Imibereho Myiza y’ Abaturage we n’ Itsinda yari ayoboye bakiriye ibibazo by’ Abaturage bo mu murenge wa Tare.

Muri uku Kwezi kwahariwe gukemura ibibazo by’ Abaturage, ibibazo bidahita bibona ibisubizo by’ ako kanya, bisubizwa mu gihe kitarenze iminsi 15.