Kuri uyu wa 18 Kamena 2023, ku biro by' Akarere ka Nyamagabe habereye umuhango wo kwibuka ku nshuro ya 29 abari abakozi ba Perefegitura ya Gikongoro ndetse n' abikoreraga bazize Jenoside yakorewe Abatutsi mu Rwanda.

Uyu muhango wabanjirijwe no gushyira indabo ku mva ziruhukiyemo imibiri y' Abatutsi bazize Jenoside yakorewe Abatutsi ziri ku Rwibutso rwa Jenoside yakorewe Abatutsi rwa Murambi.

Uwamahoro Clothilde, Perezidante w' Inama Njyanama y' Akarere ka Nyamagabe wari Umushyitsi Mukuru muri uyu muhango yabwiye abawitabiriye ko abari abakozi ba Perefegitura ndetse n' abari abacuruzi muri iyi Perefegitura bagaragaje ubwitange budasanzwe mu kugerageza kwita ku mbaga y' Abatutsi bari mu kaga kandi batayobewe ko na bo ubwabo bahigagwa. Yatanze urugero rw' umucuruzi wafashe imodoka ye akayipakira ibiryo agashyira impunzi.

Uyu muhango wo kwibuka ku nshuro ya 29 abari abakozi ba Perefegitura ya Gikongoro bazize Jenoside yakorewe Abatutsi wasojwe no gusoma amwe mu mazina yanditse ku kimenyetso cy' Urwibutso rwa Jenoside yakorewe Abatutsi mu Rwanda kiri imbere y' ibiro by' akarere.

Soeur Immaculée Uwamariya watanze ikiganiro yabwiye Abakozi b' Akarere ka Nyamagabe ko kuba umuntu yarahuye n' ibibazo bitamubuza kubababarira no kugira icyizere cy' uko ejo hazaza hazaba ari heza.Yagize ati:" Amaso yarize ni yo ahoza."