Kuri uyu wa 13 Mata 2024, Umuyobozi w'Akarere Bwana Hildebrand NIYOMWUNGERI ari kumwe n'Abayobozi b'Akarere Bungirije, abagize Inama y'Umutekano Itaguye y'Akarere, Abajyanama mu Nama Njyanama y'Akarere, abahagarariye Amadini n'Amatorero n'abandi Bayobozi mu byiciro bitandukanye, yifatanyije n'abaturage b'Umurenge wa Tare n'iy'icyahoze ari  Komini Mudasomwa mu muhango wo kwibuka ku nshuro ya 30 Jenoside yakorewe Abatutsi mu 1994.

Umuhango wo kwibuka ku nshuro ya 30 Jenoside yakorewe Abatutsi mu Murenge wa Tare no mu Mirenge y'icyahoze ari Komini Mudasomwa ari yo Kitabi, Uwinkingi na Kibirizi wahuriranye na gahunda yo gusoza Icyumweru cy'Icyunamo ku rwego rw'Igihugu.

Butera Dismas, Umwunganizi mu Mategeko (Avocat) akaba n'umwe mu bari batuye mu cyahoze ari Komini Mudasomwa yasabye ababyeyi kwigisha abana babo amateka mabi yaranze u Rwanda  badaciye ku ruhande.

Yifashishije bimwe mu bimenyetso bigaragaza uko Jenoside yakorewe Abatutsi mu Rwanda yateguwe birimo Indangamuntu zabaga zanditsemo ubwoko bwa buri muntu, ibinyamukuru nka Kangura, ibitabo byandikwagamo Politiki y'Iringaniza mu Mashuri, yavuze ko hari amakuru ku byabye mu Rwanda bamwe mu babyeyi bahisha abana babo kandi bitari bikwiye.

Yagize ati: " Nk'ubu hari ababyeyi batinya kwereka abana babo Indangamuntu zabaga zirimo ubwoko bwa buri muntu bitwaje ko bazitaye kandi bazibitse. Bariya bana banyu murikubahemukira kuko batazamenya uko umugambi mubisha wa Jenoside yakorewe Abatutsi wateguwe."

Perezida wa IBUKA mu Karere ka Nyamagabe SINDUKUBWABO Patick yashimiye Ubuyobozi Bukuru bw'Igihugu n'ubw'Akarere budahwema kuba hafi Abacitse ku icumu rya Jenoside yakorewe Abatutsi mu 1994.
Gusa yasabye ko inkunga bahabwa by'umwihariko Intwaza yajyana n'igihe.

Umuyobozi w'Akarere ka Nyamagabe Bwana Hildebrand NIYOMWUNGERI yavuze ko umwaka wa 2024, ari uw’amateka akomeye ku Rwanda.
Yagize ati: “Uyu mwaka twibukamo ku nshuro ya 30 Jenoside yakorewe Abatutsi mu 1994, ni umwaka wihariye mu mateka yacu.
Ni umwaka ku nshuro ya mbere mu mateka y'u Rwanda ya nyuma y’1959, rugize imyaka 30 yose yikurikiranye nta Mututsi wishwe, umeneshejwe, utwikiwe cyangwa ngo aririrwe inka kuko ari Umututsi.
Nta n’undi muntu wundi ibi byabayeho muri iyi myaka 30. Ndabasaba ngo mureke tubifate nk’umusogongera mwiza w’amateka mashya u Rwanda rwanditse."

Ku bijyanye n'imbogamizi zagaragajwe n'uhagarariye IBUKA mu Karere, Meya NIYOMWUNGERI yizeje Abacitse ku Icumu rya Jenoside yakorewe Abatutsi mu 1994 bo muri aka Karere, ko zigiye kwitabwaho.
Honorable Depite Sebera Henriette watanze ikiganiro kijyanye no kwibuka ku nshuro ya 30 Jenoside yakorewe Abatutsi mu 1994 mu cyahoze ari Komini Mudasomwa, yavuze ko urubyiruko rugomba guhabwa uburere bwiza kandi rukigishwa amateka y'u Rwanda kuko ari imbaraga z’Igihugu.
Yagize ati: “Muri miliyoni hafi 14 z’Abanyarwanda, abenshi ni urubyiruko. Birakwiye ko turwigisha amateka y’igihugu, bakamenya ameza n’amabi kuko ni zo mbaraga igihugu cyacu gifite.”
Umuhango wo kwibuka ku nshuro ya 30 Jenoside yakorewe Abatutsi mu cyahoze ari Komini Mudasomwa, wasojwe no kunamira imibiri y'abazize Jenoside yakorewe Abatutsi mu 1994 igera ku 4201 iruhukiye mu Rwibutso rwa Jenoside rwa Nyamigina ruherereye mu Murenge wa Tare.