Ku wa kabiri tariki ya 28/01/2020 mu nzu y’Akarere ka Nyamagabe (Hope house) hateraniye inama y’Uburezi yaguye iyobowe n’Umuyobozi w’Akarere wungirije Ushinzwe imibereho myiza, Madame MUJAWAYEZU Prisca. Inama kandi yitabiriwe n’abayobozi mu nzego zitandukanye ku rwego rw’Akarere barimo: Ubahagarariye inzego z’umutekano (Ingabo na Police), Ushinzwe urwego rw’abinjira n’abasohoka, Umuyobozi w’Ishami ry’Uburezi mu Karere Bwana NTEZIRYAYO Andre, Abakozi bashinzwe Uburezi mu ishami ry’Uburezi mu karere ka Nyamagabe, Abafatanyabikorwa mu Burezi bakorera mu Karere ka Nyamagabe (BLF, Educate na Soma Umenye), Abanyamabanga Nshingwabikorwa b’imirenge, Abakozi bashinzwe uburezi mu Mirenge (SEIs) n’Abayobozi b’ibigo by’amashuri y’incuke, abanza n’ayisumbuye..

Mu gutangiza inama Umuyobozi w’Akarere Wungirije Ushinzwe Imibereho Myiza yasabye abitabiriye inama gusubiza amaso inyuma bakarebera hamwe uburyo imitsindire yagenze mu mwaka w’Amashuri ushize wa 2019.

Mu biganiro bitandukanye byatanzwe n’Umuyobozi w’Ishami ry’Uburezi na bamwe mu bayobozi b’ibigo bari mu nama ku ngingo ziri ku murongo w’ibyigwa hafashwe imyanzuro ikurikira :

1. Mu mashuri abanza ibigo bya SOS GIKONGORO na ACEPR byatsinze neza cyane kuko ari nabo bonyine bafite bamwe mu banyeshuri bujuje mu kizamini cya Leta (5/5). Ibindi bigo birasabwa kwigira kuri bigo bitsindisha neza mu rwego rwo kugira ngo turusheho kuzamura imitsindire mu Karere ka Nyamagabe.

2. Kunoza imyigire n’imyigishirize birakwiriye ku nzego zose turushaho guhangana n’imbogamizi z’abana bakerererwa, basiba n’abata ishuri, ubucucike mu mashuri, intebe zicarwaho n’abanyeshuri zidahagije n’ibindi.

3. Gutsinda ni umuhigo ukurikiranwa na MINEDUC kandi tugomba kuwesa. Umwaka ushize ntitwawesheje neza uko byagomba. Hakenewe impinduka mu mikorere irasa ku ntego

4. Abayobozi b’ibigo by’amashuri bafatanije n’abarezi barasabwa kwita ku myigire n’imyigishirize mu buzima bwabo bwa buri munsi kandi abana biyandikishije mu gukora ikizamini cya Leta bagomba kuguma mu mashuri   mu rwego rwo kubategura kuzatsinda neza ikizamini cya Leta  kuko iyo bagaruwe bari barataye ishuri bituma batsindwa.

5. Abarezi, ababyeyi n’abafatanyabikorwa mu burezi (Kiliziya,Amadini, amatorero n’ abayobozi b’inzego z’ibanze) barasabwa gukangukira uburezi bw’abana bakuraho imbogamizi zose zituma abana badashobora kwiga neza. Gukunda abo barera, kuba intangarugero muri byose, kwitabira akazi ku gihe, kuba inyangamugayo, gukunda umurimo, guhanga udushya no kwishakamo ibisubizo bikwiriye mu kuzamura ireme ry’uburezi.

6. Mu kuzamura imitsindire mu mashuri abanza n’ayisumbuye komite zitandukanye mu mashuri zigomba gukora kandi zigakangurira ababyeyi bahagarariye ku kwita ku myigire y’abana, guha abanyeshuri ibikoresho, kudakereza abana kujya ku ishuri, guha abana umwanya wo gusubiramo amasomo igihe bari mu rugo, kwitabira inama ku ishuri, kwihangira imirimo kugira ngo bivane mu bukene, kwitabira gahunda zose z’iterambere ry’ishuri, no gusura abana ku mashuri.

7. Abarezi basabwa gutegura amasomo baha abana, gukunda umurimo, kugira umutimanama no kwisuzuma nyuma yo gutanga amasomo yabo (Auto-evaluation).

8. Abayobozi b’ibigo by’amashuri barasabwa kugira imikoranire ikwiriye hagati y’ubuyobozi bw’ikigo,  abarezi n’ababyeyi,  kubahiriza amabwiriza n’amategeko agenga uburezi,  gucunga neza umutungo w’ishuri,  kwita ku isuku mu bigo by’amashuri no kugira igenamigambi rikwiriye kandi riganisha ku ireme ry’uburezi.

9. Umuyobozi w’ishuri asabwa kugira icyerekezo cy’ishuri kandi agaharanira kubyumva kimwe n’abo ayobora. Icyerekezo cy’ishuri gituma habaho igenamigambi rirambye ry’igihe kirekire (School Improvement Plan), Iteganyabikorwa (Action plan), Ingengo y’Imari (Budget plan). Ni ngombwa ku muyobozi w’ishuri kujya no kugisha inama ndetse no gukorana n’abafite aho bahuriye n’ikigo bose (school community) mu rwego rwo kugera ku cyerekezo cy’ishuri. 

10.  Aboyobozi b’amashuri barasabwa gushyira mu myanya abarezi (gupanga neza) hakurikijwe ubushobozi abarezi bafite kandi bibanda ahari ibibazo (fixing gaps) bituma umusaruro urushaho kuba mwiza. Gutsindwa biboneka mu bigo bimwe na bimwe biba bishingiye ku buyobozi budashoboye (Poor leadership) iyo bikosotse umusaruro nawo uba mwiza. Abayobozi b’ibigo bakwiriye gukurikirana uburyo abarimu bakurikirana kandi bakanigisha amasomo hashyirwa ingufu mu ikoreshwa n’ishyirwamubikorwa ry’integanyagisho iha umunyeshuri uruhare mu myigire ye (CBC).

11.  Buri muyobozi w’ikigo yite ku nshingano ze, akurikirane imyigire, imyigishirize, imikorere ya mwarimu umunsi ku wundi kandi isuku  ibe ku isonga mu kigo hose.

12.  Buri kigo cy’ishuri kigomba kugira icyumba cy’amakuru (Situation room) aho amakuru yose ya buri munsi agaragazwa (Ubwitabire bw’abarimu n’abanyeshuri, abakererewe, abasibye n’ibindi).

13.  Ba nyir’ibigo biyemeje kwegera ibigo byabo bakajya babisura bakanabigira inama mu rwego rwo guteza imbere umusaruro muri byo. 

14.  Inama y’uburezi mu murenge kujya ibera mu bigo bigenda bisimburanwa mu rwego rwo kwigenzura no kwigiranaho (Peer learning and peer review). 

15.  Mu bigo by’amashuri birakwiriye gushyira mu bikorwa gahunda ya CPD (Continous Professional Develpment) na SBI (School Based in service Training) aho abarimu bihugura kandi bagahugurana mu rwego rwo kunoza imyigishirize.

16.  Gukoresha komite za Sector & District CPDs mu rwego rwo kuzamura ireme ry’uburezi mu mashuri yose ari mu Karere ka Nyamagabe.

17.  Gukomeza gahunda yo gutanga ifunguro rya saa sita ku banyeshuri bose biga mu mashuri ya 9&12 YBE.Ibi birajyana no gukomeza kwishakamo ibisubizo hashyirwaho uturima tw’imboga (jardins potagers) twunganira iyi gahunda mu mashuri yose bituma nk’Imparirwamihigo tuguma ku isonga.

18.  Mu rwego rwo guca guta ishuri (drop out), habeho ubufatanye n’inzego z’ibanze kugira ngo abana bose aho baherereye hamenyekane bityo binyuze mu itorero ry’umudugudu abo bose bagaruke mu ishuri.

19.  Ku rwego rw’umurenge hashyirweho (igiceri program) mu gushyigikira abana b’abakene badafite ibikoresho by’ishuri (amakayi, uniformes, inkweto).

20.  Abayobozi b’ibigo by’amashuri bihisha mu nshingano zitandukanye mu nzego z’ibanze bakwiriye kumenyekana kandi bakisubiraho mu rwego rwo kuzuza neza inshingano z’ingenzi bafite mu guteza imbere ibigo by’amashuri bayobora.