Kuri uyu wa 13 Gashyantare 2024, Umuyobozi w'Akarere Wungirije Ushinzwe Imibereho Myiza y'Abaturage Madame Agnès UWAMARIYA yakiriye itsinda rigizwe n’Abarimu n’Abanyeshuri bo mu Ishuri Rikuru rya Gisirikare rya Nyakinama riherereye mu Karere ka Musanze bari mu rugendoshuri rwo kureba uko ibikorwaremezo by’ingufu z’amashanyarazi zifashe mu Karere kacu.

Abagize iri tsinda ryari riyobowe na Brigadier General JC Ngendahimana, babanje kugaragarizwa mu nyandiko aho Akarere gahagaze mu gukwirakwiza amashanyarazi mu baturage, imiyoboro y’umuriro w’amashanyarazi iri kubakwa, ingomero z'amashanyarazi zigera kuri 3 ziri mu Karere n'akamaro zifitiye abaturage baturanye nazo bahabwa n’umwanya wo kubaza ibibazo, binahabwa ibisubizo.

Mbere yo gusoza urugendoshuri bagiriraga mu Karere ka Nyamagabe, baherekejwe n’Umuyobozi w’Akarere Wungirije Ushinzwe Imibereho Myiza Agnès UWAMARIYA basuye urugomero rw'amashanyarazi rwa Rukarara ya mbere ruherereye mu Murenge wa Kibirizi, basobanurirwa imikorere yarwo.

Brigadier General JC Ngendahimana wari uyoboye iri tsinda ry’Abarimu n’Abanyeshuri bo mu Ishuri Rikuru rya Gisirikare rya Nyakinama yashimye uburyo Akarere ka Nyamagabe kita ku bikorwaremezo by’amashanyarazi, anashima ko biri kwihutishwa cyane mu kugezwa ku baturage.