Ku wa 13 no ku wa 14 Gashyantare 2025, abagize Komite Nyobozi y’Akarere bari kumwe n’abagize Inama y’Umutekano Itaguye y’Akarere bakiriye Honorable Senateri Emmanuel HAVUGIMANA na Honorable Depite UWAMARIYA Salama bo mu Ihuriro ry'abagize Inteko Ishingamategeko rikumira Jenoside, Ihakana n'Ipfobya bya Jenoside yakorewe Abatutsi bagiranye ibiganiro n'ibyiciro bitandukanye mu Murenge wa Mbazi.

Ibiganiro batanze byibanze ku bikubiye mu masezerano mpuzamahanga yerekeye gukumira no guhana icyaha cya Jenoside n’ingamba zo gukomeza kubahiriza ihame remezo ryerekeye kurandura burundu ingengabitekerezo ya Jenoside n’ibyo igaragariramo byose.

Hatanzwe ibiganiro byibanze ku ncamake y’amateka y’ubukoroni mu Rwanda, inkomoko y’amacakubiri kugeza kuri Jenoside yakorewe Abatutsi mu 1994, gukoresha neza imbuga nkoranyambaga (Social Media) mu kugaragaza ukuri kuri Jenoside yakorewe Abatutsi, kwibutsa urubyiruko igisobanuro nyacyo cya Jenoside, ingengabitekerezo yayo n’ingamba zo kuyirwanya n’ibindi.

By’umwihariko urubyiruko rwasabwe gukunda umurimo ruharanira kwigira.