Guhera ku wa 26 kugeza ku wa 28 Mutarama 2023, Minisitiri w’Uburinganire n’iterambere ry’Umuryango, Prof. Bayisenge Jeannette yagendereye Akarere ka Nyamagabe maze asura ibikorwa bitandukanye ndetse akorana inama n’abayobozi ku kwihutisha iterambere ry’Akarere.

Ku munsi wa mbere w’uruzinduko, Minisitiri Bayisenge akaba n’imboni y’Akarere ka Nyamagabe muri Guverinoma yasuye Ibitaro bya Kaduha, umuhanda wa Kaduha-Mushubi ndetse asura n’Ibitaro bya Kigeme.

Mu Bitaro byombi, Minisitiri aherekejwe na Perezida w’Inama Njyanama y’Akarere, Uwamahoro Clothilde ndetse n’Umuyobozi w’Akarere ka Nyamagabe, Hildebrand Niyomwungeri bakoranye inama n’Ubuyobozi n’Abakozi b’Ibitaro maze baganira ku mitangire ya serivisi.

By’umwihariko, Minisitiri yasabye ko amavuriro y’ibanze (Health Posts) zidakora neza zafashwa zikarushaho gukora no kwegereza abaturage serivisi.

Ku munsi wa kabiri w’uruzinduko, Minisitiri Bayisenge yasuye ibikorwa by’iterambere mu Murenge wa Gatare. Muri uyu Murenge yasuye aharimo gucibwa amaterasi mu mishinga ikorerwa mu Mirenge ikikije Parike ya Nyungwe (Borderline Projects).

Yakomeje asura Koperative y’Abahinzi b’Icyayi yitwa COTHEGAB, aho yaganiriye n’Ubuyobozi bwa Koperative n’abahinzi bahagarariye abandi.

Minisitiri kandi yasuye agashya k’Iriba rya Masenge gaherereye mu Murenge wa Gatare. Mu Iriba rya Masenge abana batozwa umuco, kwirinda ingeso mbi, gukangurira imiryango kwirinda amakimbirane, kurwanya imirire mibi n'igwingira mu bana n'ibindi.

Muri ibi bikorwa yasuye, Minisitiri Bayisenge yatanze ubutumwa bwagarutse ku gukomeza ibikorwa by’iterambere by’umwihariko no kwita no gusigasira umuryango bahereye ku bana bato barindwa igwingira n’imirire mibi. Yibukije abaturage kandi kwirinda amakimbirane mu miryango kuko adindiza iterambere ryabo.

Ku munsi wa kabiri w’uruzinduko, Minisitiri Bayisenge yakoranye inama 'abayobozi b'Inama Njyanama, Komite Nyobozi y'Akarere, abakozi b'Akarere, Abanyamabanga Nshingwabikorwa b'Imirenge, inzego z'umutekano n'abahagarariye inzego z'urubyiruko (NYC), abagore (CNF) n'amadini.

Muri iyi nama Minisitiri yasobanuriwe aho imihigo y’Akarere igeze ishyirwa mu bikorwa ndetse bungurana n’ibitekerezo ku bikorwa bitandukanye byateza imbere Akarere ka Nyamagabe.

Ku munsi wa gatatu w’uruzinduko, Minisitiri Bayisenge yifatanyije n’abaturage b’Umurenge wa Buruhukiro mu muganda rusange usoza ukwezi kwa Mutarama. Muri uyu muganda haciwe amaterasi ku buso bungana na 4.5 hectares ndetse hanahingwa imirima mu rwego rwo gutegura igihembwe cy’ihinga cya 2023B.

Mbere yo gusoza uruzinduko, aherekejwe na Perezida w’Inama Njyanama y’Akarere ka Nyamagabe ndetse n’Umuyobozi w’Akarere Wungirije Ushinzwe Iterambere ry’Ubukungu, Thaddée Habimana, Minisitiri yasuye imihanda ya kaburimbo irimo kubakwa mu Mujyi wa Nyamagabe.