Kuri uyu wa 18 Ukwakira 2023, Minisitiri Ushinzwe Ibikorwa by' Ubutabazi Maj. Gen. (Rtd.) Albert Murasira yasuye Akarere ka Nyamagabe yakirwa n’ Umuyobozi w’ Akarere Bwana Hildebrand NIYOMWUNGERI n’ Umunyamabanga Nshingwabikorwa w’ Akarere Bwana Alfred NGARAMBE.

Ibiganiro bagiranye, byibanze ku ishusho y’ imicungire y’ Ibiza mu Karere, imbogamizi zihari n’ ingamba zo gukumira no kugabanya ingaruka ziterwa n’ Ibiza.

Nyuma yo kuganira n’ Ubuyobozi bw’ Akarere Minisitiri Maj. Gen. (Rtd.) Albert Murasira ari kumwe n’ aba Bayobozi yasuye Inkambi ya Kigeme icumbikiye Impunzi z’ Abanyekongo zisaga ibihumbi 15 bagirana ibiganiro n’ Abafatanyabikorwa bakorera muri iyi Nkambi ndetse na Komite Nyobozi yazo.

Ibiganiro bagiranye biybanze ku iterambere ry’ imibereho yazo.

Mu ijambo ry’ ikaze, Umuyobozi w' Akarere Bwana Hildebrand NIYOMWUNGERI yavuze ko Akarere gafatanyije n' Abafatanyabikorwa gashyira ingufu mu kuzamura imibereho y’ Impunzi zo muri iyi Nkmabi ya Kigeme ndetse n' imibanire hagati ya zo n' Abanyarwanda baturanye ahanini binyuze mu mishinga inyuranye irimo iyo kubaha amahugurwa no kubahuriza hamwe mu bikorwa by' ubuhinzi n' ubucuruzi.

Minisitiri wa MINEMA (Ministeri y’ Ibikorwa by’ Ubutabazi) Maj. Gen. (Rtd.) Albert Murasira yashimiye Akarere uburyo kita ku Mpunzi zo mu Nkambi ya Kigeme, azisezeranya ko nubwo zitari iwabo Leta y' u Rwanda izakora uko ishoboye kose kugira ngo zibeho nk'Abaturage b'Igihugu

Inkambi y’ Impunzi ya Kigeme, icumbikiye Impunzi z’ Abanyekongo zigera ku bihumbi 15.