Kuva ku wa 17 kugeza ku wa 19 Nzeri 2025, mu Karere habaye amahugurwa agamije kongerera ubushobozi Inzego z'Ibanze mu bikorwa by'isanamitima, ubumwe, ubwiyunge n'ubudaheranwa yateguwe ku bufatanye bw'Akarere na Prison Fellowship Rwanda.

Atangiza aya mahugurwa, Umuyobozi w'Akarere Wungirije Ushinzwe Imibereho Myiza y'Abaturage, Madame Agnès UWAMARIYA yibukije abitabiriye aya mahugurwa kurushaho kwita no gufasha abagaragaje ibimenyetso by’ibibazo bikomoka ku mateka ya Jenoside yakorewe Abatutsi mu 1994birimo ihungabana, barushaho gusigasira ubumwe, ubwiyunge n’ubudaheranwa bw’Abanyarwanda.

Amahugurwa yitabiriwe n’abakozi bashinzwe irangamimirere mu Mirenge, abahagarariye Inshuti z’Imiryango (IZU) mu Mirenge, abakozi bo ku Bitaro by’Akarere bashinzwe kwita ku buzima bwo mu mutwe, abakozi b’Igororero rya Nyamagabe bashinzwe imibereho myiza n’ibikorwa by’Igororero n’abandi, hatanzwe ibiganiro ku buzima bwo mu mutwe.

Aya mahugurwa yasojwe n'igikorwa cyo guhuza abagabo n’abagore bo mu Murenge wa Mbazi bahamwe n'icyaha cya Jenoside yakorewe Abatutsi mu 1994 barangije ibihano n’imiryango y'Abacitse ku Icumu rya Jenoside yakorewe Abatutsi mu 1994, baganirizwa kuri gahunda ya ‘Mvura Nkuvure’ iteza imbere isanamitima, ubumwe n'ubudaheranwa bw'Abanyarwanda.