Ku wa 07 Mutarama 2025, mu cyumba cy’inama cy’Umurenge wa Gasaka habereye ibiganiro bigamije kwimakaza ubumwe n'ubudaheranwa by'Abanyarwanda byateguwe na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE). 

Mu rwego rwo kwimakaza ubumwe n’ubudaheranwa, Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), yateguye ibiganiro bihuza inzego z’ibanze n’abahagarariye imiryango irengera inyungu z’Abarokotse Jenoside yakorewe Abatutsi hagamijwe gusuzuma ibibazo byihariye Abarokotse Jenoside yakorewe Abatutsi bahura na byo n’ingamba zo kubikemura. 

Atangiza ibi biganiro, Umuyobozi w'Akarere, Bwana Hildebrand NIYOMWUNGERI yavuze ko mu rwego rwo kurushaho kuzamura imibereho y'Abarokotse Jenoside yakorewe Abatutsi bo mu Karere, hateganyijwe igikorwa cyo kubasura aho batuye, hakarebwa ibibazo byihariye bafite n'uburyo byakemurwa.

Muri ibi biganiro, Minisiteri y'Ubumwe bw'Abanyarwanda n'Inshingano Mboneragihugu (MINUBUMWE) yari ihagarariwe na Honorable Marie Alice Kayumba Uwera, Umuyobozi ushinzwe Ubumwe n'Ubudaheranwa muri iyi Minisiteri. 

Ibi biganiro byitabiriwe kandi n’Umuyobozi w'Akarere Wungirije Ushinzwe Iterambere ry'Ubukungu, Bwana Thaddée HABIMANA, Umuyobozi w'Akarere Wungirije Ushinzwe Imibereho Myiza y'Abaturage, Madame Agnès UWAMARIYA na bamwe mu bagize Inama y'Umutekano Itaguye y'Akarere. 

Guhera mu 1998, Leta y’u Rwanda yashyize imbaraga mu gufasha abatishoboye barokotse Jenoside yakorewe Abatutsi ibinyujije mu Kigega FARG. 

Inkunga zatanzwe zibanze cyane cyane mu burezi, mu buvuzi, mu mishanga ibyara inyungu, mu macumbi n’inkunga y’ingoboka. Izi gahunda zose zafashije Abarokotse Jenoside yakorewe Abatutsi kugarura icyizere.