Kuri uyu wa 25 Kamena, Umuyobozi w' Akarere Wungirije Ushinzwe Iterambere ry' Ubukungu Bwana Thaddée HABIMANA yayoboye umuhango wo gusoza ibikorwa byo kwibuka ku nshuro ya 29 Jenoside yakorewe Abatutsi mu karere ka Nyamagabe, ukaba warabereye mu cyahoze ari Komini Musange.

Uyu muhango wanitabiriwe n' abahagarariye inzego z' umutekano, iz' amatorero n' amadini wabanjirijwe n' igikorwa cyo gushyira indabo mu mugezi wa Mwogo mu rwego rwo guha icyubahiro Abatutsi bazize Jenoside yakorewe Abatutsi bawujugunywemo no gushyira indabo ku mva ziruhukiyemo imibiri igera ku bihumbi 26.

Umuyobozi w' Akarere Wungirije Ushinzwe Iterambere ry' Ubukungu Thaddée HABIMANA yavuze ko Kwibuka Abazize Jenoside yakorewe Abatutsi ari ukubaha agaciro bambuwe no kuzirikana amateka mabi yaranze u Rwanda. Yagize ati:" Kwibuka si ukwibagirwa, ahubwo ni uguha agaciro abacu bambuwe, ni ukuzirikana amateka mabi yaranze uru Rwanda, tuvanamo amasomo yo kutazayasubira, tukita ku biduhuza, tukubaka ubumwe bwacu, maze tukarangwa n’ubudaheranwa budufasha kwiyubaka."

Honorable Marie Claire UWUMUREMYI wari Umushyitsi Mukuru muri uyu muhango yavuze ko kwibuka Abazize Jenoside yakorewe Abatutsi ari ari ukongera gusabana na bo no kuzirikana indangagaciro zabarangaga.

Mu murenge wa Musange, amateka ya Jenoside, agaragaza uruhare rutaziguye rw’ ubutegetsi muri jenoside yakorewe abatutsi. Abatutsi b' i Musange nyuma yo kubona batangiye gutwikirwa inzu bagiye gutabaza kuri Komini aho kubatabara bababwira ko baza kuri Komini aho ubutegetsi bwababeshye ko bushobora kubarindira umutekano, ko ntawe ubasha kubakoraho ariko nta mugambi wo kubarindira umutekano wari uhari, yari amayeri kugira babone uko babicira hamwe. Uwari Burugumesitiri Bizimana Bernard wayoboraga komini Musange yafashe imodoka ya Komini azenguruka amasegiteri yose afite indangururamajwi avuga ngo Abatutsi bose nibahungire ku biro bya komini azabarinda. Bahise batangira kuhahungira ari benshi bajya no mu rukiko, bahaba mu buzima butoroshye kuko byageze aho interahamwe yitwa Mbayire Longine ibakatira amazi batangira kuvoma ayo mu mugezi wa Muhura ariko Burugumesitiri Bizimana yahise ashyiraho uruzitiro abwira abapolisi ba komini ngo uzarurenga bazamurase. Si Abatutsi b’ i Musange bahaguye gusa, hari n’abandi bari baturutse mu makomini bahana imbibi, hiyongeraho abahiciwe baturuka i Kaduha muri Karambo nyuma y’ubwicanyi bwari bumaze kuhabera. Kuri aba kandi hiyongeraho Abatutsi baroshywe mu migezi ya Mwogo, Mbirurume na Rukarara ikikije iyo Komini.