Kuri uyu wa 11 Ukuboza 2025, Umuyobozi Mukuru w'Ikigo cy'Igihugu gishinzwe Imikurire no Kurengera Umwana (NCDA), Honorable INGABIRE Assumpta ari kumwe n'Umunyamabanga Nshingwabikorwa w'Intara y'Amajyepfo, Bwana Védaste NSHIMIYIMANA, bakiriwe na Perezida w'Inama Njyanama y' Akarere, Madame Clotilde UWAMAHORO wari uri kumwe n'Umuyobozi w'Akarere, Bwana Hildebrand NIYOMWUNGERI, Umuyobozi w' Akarere Wungirije Ushinzwe Imibereho Myiza y'Abaturage, Madame Agnès UWAMARIYA hamwe na bamwe mu bagize Inama y' Umutekano Itaguye y' Akarere. 

Bari baje kwifatanyije n'abaturage b'Akarere ka Nyamagabe by'umwihariko abo mu Murenge wa Gasaka mu birori by’Umunsi Mukuru w'Imbonezamikurire y'Abana Bato (ECD Day) ku rwego rw’Igihugu byabereye kuri Stade Nyagisenyi. Ibirori byabanjirijwe no gusura Urugo Mbonezamikurire y'Abana Bato rukorera hafi y'Abaturage rwa Gasaka n'Urugo Mbonezamikurire y'Abana Bato rubarizwa mu Igororero rya Nyamagabe.

Habayeho kandi imurikabikorwa rito (Mini Expo). Umuyobozi Mukuru wa NCDA, Honorable INGABIRE yasabye ababyeyi bo mu Karere ka Nyamagabe kwita ku mikurire y'abana babo babajyana mu Ngo Mbonezamikurire y'Abana Bato hakiri kare kugira ngo bazageze igihe cyo kujya kwiga ubwonko bwaramaze gukanguka.

Muri ibi birori byo kwizihiza Umukuru Mukuru w’Imbonezamikurire y’Abana Bato (ECD Day), abana bafite ubumuga bw'ingingo nabo bahawe inyunganirangingo hamwe n’amagare.