Iki gikorwa cyayobowe n’Umuyobozi w’Akarere Wungirije Ushinzwe Iterambere ry’Ubukungu, Bwana Kabayiza Lambert ari hamwe n’Umuyobozi wa RAB ishami rya Nyamagabe ndetse n’abandi bafatanyabikorwa b’Akarere mu buhinzi.

Gutangiza ku mugaragaro ibi bikorwa byabereye mu gishanga cya Muzirantwago gihuriweho n’Imirenge ya Gasaka, Cyanika na Kibilizi. Abaturage bo muri iyi Mirenge kandi bahuriye muri iki gikorwa maze batera imbuto y’ibishyimbo kuri site ya ‘Uwurutare’.

Aganira n’abaturage bitabiriye iki gikorwa, Umuyobozi w’Akarere Wungirije Ushinzwe Iterambere ry’Ubukungu, Bwana Kabayiza Lambert yabashimiye ko bamaze kumenya gufata neza umusaruro wabo kuko bakoresha ubwanikiro bubakiwe kandi bakawubyaza umusaruro.

Yabasabye kwitabira guhinga hakiri kare kugira ngo imvura izacike ahateganyijwe guhinga hose barahageze.

Yagize ati “Uyu munsi wari uwo gutangiza ku mugaragaro, murabizi barabivuze ko imvura izaba nkeya, niyo mpamvu iyo imvura izaba nke n’iyo izaba nyinshi ibikorwa dukora bigoma gutandukana. Iyo izaba nyinshi uwahinga kare n’uwahinga akererewe bose bashobora kweza. Iyo imvura izaba nke biba bisaba guhinga vuba kugira ngo izagwa yose tuyakire tubashe kurengera ibihingwa byacu”.  

Yasabye ko abaturage bahera ku buso buri mu bishanga barangiza bakajya n’i musozi kuko hakenewe kongerwa ubutaka buhinzeho.

Yagize ati “Ahantu hose turashishikarizwa kuhahinga kuko urebye ubukungu bumaze kuzahara bitewe n’iki cyorezo ahantu tubona dushobora twagira icyo tuhakora tukaziba icyuho ni mu buhinzi, bivuze ko mu Karere kacu ku buso twajyaga duhinga dufite hectare zigera hafi ku bihumbi bitatu z’ubuso bushya butahingwaga zigomba kwiyongera ku buso busanzwe, nta bandi bazabuhinga ni mwebwe, ahantu hose habasha guhingwa tuhahinge”.

Muri iki gikorwa, V/Mayor Kabayiza yibukije abaturage gukomeza gukaza ingamba zo kwirinda icyorezo cya COVID19 ndetse no kwitabira kwishyura ubwisungane mu kwivuza kugirango igihe barwaye bazabone ubuvuzi butabahenze.