Iyi nzu yubakiwe Mukeshimana ifite ikigega gifata amazi, igikoni, ubwogero n'umusarane ndetse akaba yayishyikirijwe irimo n'ibikoresho byo mu nzu (intebe, akabati, ibitanda n'ibiryamirwa).

Iki gikorwa cyayobowe n'Umuyobozi wa Police mu Karere ka Nyamagabe, SSP Burahinda Ntacyo ari hamwe n'Umuyobozi w'Ishami ry'Imiyoborere Myiza mu Karere, Irakuzwa Patrick.

Iyi nzu ni imwe mu bikorwa byakozwe na Police mu kwezi kwahariwe ibikorwa byibanda ku bukangurambaga mu kurwanya ibyaha no guteza imbere imibereho myiza y’abaturage.

Umuyobozi wa Police mu Karere ka Nyamagabe yabwiye abari muri iki gikorwa ko ubufatanye bw'abaturage na Police mu gucunga umutekano wa buri munyarwanda ari ingenzi, yibukije buri muturage kuba ijisho rya mugenzi we.

Umuyobozi w’Ishami ry’Imiyoborere Myiza mu Karere yashimye Police n’urubyiruko rw’abakorerabushake ku mbaraga bakoresheje kugira ngo haboneke ibikorwa nk’ibi biganisha ku iterambere ry’imibereho myiza y’abaturage.

Mukeshimana wubakiwe inzu ni umupfakazi utishoboye ufite abana babiri.