Kuri uyu wa 02 Ukwakira 2023, mu Murenge wa Mushubi, Umuyobozi w’ Akarere Wungirije Ushinzwe Imibereho Myiza y’ Abaturage Madame Agnès UWAMARIYA yitabiriye ibikorwa by’ Icyumweru cyahariwe Umuryango mu Itorero ADEPR.

Agaruka ku nsanganyamatsiko y' iki Cyumweru ari yo "Ubumwe bw' Umuryango Ishingiro ry' Iterambere Rirambye", Umushumba Mukuru Wungirije w' Itorero ADEPR yavuze ko iyo habuze ubumwe, umuryango urasenyuka n' iterambere rikabura.

Yasaba abagize imiryango kwirinda icyo ari cyo cyose cyabacamo ibice.

Muri ibi bikorwa byahariwe Icyumweru cy’ Umuryango mu Itorero ADEPR, iri Torero ryishyuriye Abaturage batishoboye Umusanzu w’ Ubwisungane mu Kwivuza(MUSA) abagera kuri 700 ndetse rinaha Abakobwa babyariye iwabo imashini zidoda 20 mu rwego rwo kubafasha kwiteza imbere no kwikura mu bwigunge.

Umuyobozi w’ Akarere Wungirije Ushinzwe Imibereho Myiza y’ Abaturage Madame Agnès UWAMARIYA yashimiye Itorero ADEPR ryabonye ko umuryango ari ishingiro ry' iterambere, arishimira kandi ku bw’ izi nkunga zinyuranye ryatanze.

Vice-Mayor Asoc yaboneyeho umwanya wo guha impanuro Abakobwa abasaba kwirinda ibishuko ahubwo bakagira umwete wo gukora. Yababwiye ko ubukene budakwiye kuba impamvu yo kwishora mu bikorwa by'urukozasoni ahubwo bakumva ko bagomba kwihesha agaciro bakoresha imbaraga n' ubwenge byabo.