Ubwo yifatanyaga n’Ubuyobozi bw’Akarere mu gutangiza ku rwego rw’Akarere iminsi 16 y'ubukangurambaga bugamije kurwanya ihohotera rishingiye ku gitsina, Honorable Depite Philbert UWIRINGIYIMANA yasabye abaturage kudacyerensa amakimbirane bita ko adakomeye. 

Kuri uyu wa 25 Ugushyingo 2025, ni bwo mu Mirenge yose igize Akarere ka Nyamagabe hatangijwe iminsi 16 y'ubukangurambaga bugamije kurwanya ihohotera rishingiye ku gitsina yari ifite insanganyamatsiko igira iti: "Twubake Umuryango uzira Ihohotera”. Mu ijambo ry’ikaze, Umuyobozi w’Akarere, Bwana Hildebrand NIYOMWUNGERI yasabye abaturage kwirinda ihohotera iryo ari ryo ryose kuko rigira ingaruka zikomeye ku muryango by’umwihariko abana. Yaragize ati: "Umuryango urimo ihohotera ntutera imbere. Ushiduka kandi wageze ku byaha bikomeye birimo no kwicana kandi ingaruka zikomeye ziza ku bana. Rero turabasaba kwirinda ihohotera iryo ari ryo ryose. "

Yabasabye kandi kuzitabira gufata Indangamuntu Koranabuhanga kuko izabafasha muri byinshi muri iki gihe Igihugu n'Isi muri rusange byinjiye mu gukoresha ikoranabuhanga. Honorable UWIRINGIYIMANA Philbert wari Umushyitsi Mukuru muri iki gikorwa yasabye abaturage b'Akarere ka Nyamagabe by’umwihariko ab’Umurenge wa Cyanika kudacyerensa amakimbirane ayo ari yo yose. Yaragize ati: “Ntimugomba gucyerensa amakimbirane ayo ari yo yose. N’amwe mwita ko adakomeye agera aho akabyara ibintu bibi. Muri iyi minsi mugomba kwicara mukisuzuma, amakimbirane mufitanye mukayacoca kuko akenshi ni yo ihohotera riturukaho.”

Mu Gutangiza ku rwego rw’Akarere iminsi 16 y'ubukangurambaga bugamije kurwanya ihohotera rishingiye ku gitsina, hatanzwe serivisi ku bahuye n’ihohotera rishingiye ku gitsina. Hatanzwe kandi ikiganiro ku Itegeko rigenga abantu n’umuryango n’ikirebana n’icuruzwa ry’abantu.