Ubu bukangurambaga bwatangijwe n'urugendo rwo kwamagana ihohoterwa rishingiye ku gitsina, urugendo rwahereye mu Mujyi rwerekeza kuri Stade Nyagisenyi ahatangiwe ibiganiro bitandukanye bigamije kurwanya ihohoterwa, uburyo abahuye naryo bafashwa n'uko bahabwa ubutabera.

Ubu bukangurambaga bwateguwe n'Akarere ka Nyamagabe ku bufatanye na Life Wounds Healing Association (LIWOHA) ndetse na GIZ. Bwitabiriwe n'abaturage, abayobozi batandukanye, inzego z'umutekano n'abakora mu nzego z'ubutabera.

Abakinnyi ba filimi bamenyerewe muri Cinema Nyarwanda batanze ubutumwa binyuze mu mukino ujyanye n'insanganyamatsiko y’ubu bukangurambaga.

Muri ubu bukangurambaga hatanzwe ibiganiro bitandukanye birimo itegeko rikumira rikanahana ihohoterwa rishingiye ku gitsina, uburyo abafashwe ku ngufu bakirwa muri ISANGE One Stop Center, uburemere bw’icyaha cyo gusambanya abana n’ibihano.

Hatanzwe ikiganiro kandi ikiganiro ku kumenyesha gahunda y’ubukangurambaga bwo kwandikisha abana b’abangavu batewe inda, abitabiriye bagejejweho n’ikiganiro ku ruhare rw’abagize umuryango mu mikoreshereze y’umutungo hagamijwe kwirinda ihohoterwa rikorerwa abagore n’abakobwa.

Mu ijambo yagejeje ku bitabiriye ubu bukangurambaga, Umuyobozi w’Ishami ry’Ubuzima mu Karere, Irakuzwa Patrick yasabye ko ibikorwa bitarangirira mu bukangurambaga gusa ahubwo ko muri iyi minsi 16 hakwiye gukorwa ibintu bifatika nko kwandikisha abana babyawe n’abangavu mu gitabo cy’irangamimerere, imiryango ibana itarasezeranye ikitabira gusezerana no kwimakaza ibiganiro byo kurandura amakimbirane mu muryango.