Ni umuhango witabiriwe na Perezida w’Inama Njyanama y’Akarere, abajyanama, Abayobozi n’abakozi b’Akarere, inzego z’umutekano, abanyamadini n’amatorero, abikorera, abahagarariye izindi nzego zikorera mu Karere n’imiryango y’abazize jenoside yakorewe abatutsi. Hatumiwemo Pasiteri Antoine Rutayisire wanatanze ikiganiro.

Uyu muhango wabanzirijwe no kunamira no gushyira indabo ku mva ziruhukiyemo abarenga 50,000 ku Rwibutso rwa Jenoside rwa Murambi no ku kimenyetso (monument) cyanditseho amazina ya bamwe mu bakozi bazize jenoside yakorewe abatutsi kiri ku Biro by’Akarere.

Muri iki gikorwa hagarutswe ku bukana bwa Jenoside mu cyahoze ari Gikongoro n’Ubuyobozi bubi burangajwe imbere n’uwari Perefe, Laurent Bucyibaruta bwashyize mu bikorwa jenoside.

Hatanzwe ubutumwa bwagarutse ku kubaka ubumwe bw’abanyarwanda, kwirinda ivangura, amoko n’ingengabitekerezo ya Jenoside. Abitabiriye basabwe kubakira kuri Ndi Umunyarwanda no kuyitoza abana.

Muri uyu muhango ubuyobozi bw’Akarere bwashyikirije inka yatanzwe n’abakozi b’Akarere umubyeyi warokotse jenoside yakorewe abatutsi, ni nyuma y’uko iyo yari yarahawe ya girinka yapfuye. Abayobozi b'Urugaga rw'Abikorera (PSF) muri Nyamagabe bashyikirije Akarere sheki ya miliyoni (1,000,000frw) izafasha mu kubakira imiryango itatu y'abarokotse Jenoside yakorewe Abatutsi mu 1994. Iyi miryango ifite inzu zishaje.