Kuri uyu wa 21 Mata 2024, Perezida w'Inteko Ishingamategeko, Umutwe w'Abadepite Honorable Donatille MUKABALISA ari kumwe na Minisitiri w'Ubumwe bw'Abanyarwanda n'Ishingano Mboneragihugu (MINUBUMWE), Dr. BIZIMANA Jean Damascène na bamwe mu bagize Inteko Ishingamategeko (Imitwe yombi) bifatanyije n'Ubuyobozi bw'Akarere n’abaturage b’Akarere by’umwihariko abo mu Mirenge ya Kamegeri na Gasaka n'inshuti zabo, mu gikorwa cyo kwibuka ku nshuro ya 30 Jenoside yakorewe Abatutsi mu 1994 ku Rwibutso rwa Jenoside rwa Murambi.

Muri iki gikorwa, Minisitiri wa MINUBUMWE, Dr. BIZIMANA Jean Damascène yatanze ikiganiro cyibanze ku itegurwa n’ishyirwa mu bikorwa rya Jenoside yakorewe Abatutsi mu cyahoze ari Perefegitura ya Gikongoro.

Yagarutse kuri amwe mu mazina y’abari Abayobozi bagize uruhare rukomeye mu iyicwa ry’Abatutsi by’umwihariko kuri uru Rwibutso rwa Jenoside rwa Murambi.

Perezida w'Inteko Ishingamategeko, Umutwe w'Abadepite Honorable Donatille MUKABALISA yasabye buri wese by'umwihariko urubyiruko kwamagana no kurwanya imvugo zisenya ibyo u Rwanda rwagezeho birimo Ubumwe n'Ubudaheranwa bw'Abanyarwanda.

Mu kwibuka ku nshuro ya 30 Jenoside yakorewe Abatutsi mu 1994 ku Rwibutso rwa Jenoside rwa Murambi, hashyinguwe mu cyubahiro imibiri y'abazize Jenoside yakorewe Abatutsi mu 1994 igera ku 158 yimuwe mu Rwibutso rwa Jenoside rwa Kamegeri muri gahunda yo guhuza Inzibutso za Jenoside n'indi 4 yabonetse. Habayeho kandi n’igikorwa cyo kunamira no guha icyubahiro, imibiri y'abazize Jenoside yakorewe Abatutsi isaga ibihumbi 50 iruhukiye muri uru Rwibutso. Kuri uyu munsi kandi, ku Rwibutso rwa Jenoside rwa Kaduha naho habaye igikorwa cyo kwibuka ku nshuro ya 30 Jenoside yakorewe Abatutsi mu 1994. Umuyobozi w'Akarere Wungirije Ushinzwe Iterambere ry'Ubukungu Bwana Thaddée HABIMANA ni we wari uhagarariye Akarere muri iki gikorwa. Ku Rwibutso rwa Jenoside rwa Kaduha, hashyinguwe mu cyubahiro imibiri y'abazize Jenoside yakorewe Abatutsi mu 1994 igera ku 10. Yasanze isaga ibihumbi 47 iruhukiye muri uru Rwibutso.