Uyu muyobozi yatangiye uruzinduko yifatanya n’abaturage mu muganda wakorewe mu Murenge wa Gasaka, Akagali ka Ngiryi.

Muri uyu muganda yari hamwe n'abajyanama mu Nama Njyanama y'Akarere, abayobozi b'Akarere bungirije bombi, inzego z'umutekano n'Ubuyobozi bw'Umurenge.

Hakozwe umuganda wo gusukura, gutema ibihuru/ibyatsi no gusibura inzira z'amazi ku muhanda uva mu Mujyi werekeza ku i Taba.

Nyuma y'umuganda hatanzwe ubutumwa bwagarutse ku kwikingiza COVID-19 byuzuye no kwishimangiza; kuzitabira ibikorwa n'ibiganiro byo kwibuka ku nshuro ya 28 Jenoside yakorewe Abatutsi mu 1994; gukumira no kwirinda ibiza; guca imirwanyasuri ndetse no gutera ibyatsi.

Umunyamabanga Uhoraho muri Minisiteri y'Ubutegetsi bw'Igihugu yagejeje ikiganiro cya Ndi Umunyarwanda ku bajyanama b'Akarere, Biro z'Inama Njyanama z'Imirenge, uhagarariye imiryango ishingiye ku myemerere mu Karere, uhagarariye abashinzwe uburezi mu Mirenge, uhagarariye abayobozi b'amashuri.

Muri iki kiganiro kandi hari abahagarariye inzego z'umutekano mu Karere. Hagarutswe ku busobanuro bwa Ndi Umunyarwanda, impamvu yayo ndetse n'icyo abitabiriye ikiganiro bategerejweho.

Ni ikiganiro cyabereye ku Isano Community Center iherereye mu Murenge wa Cyanika, Ikigo giteza imbere ubumwe n’ubwiyunge cyubatswe na Madamu wa Perezida wa Republika abinyujije muri Unity Club.

PS yabwiye abari muri iki kiganiro ko kigamije buri umwe azirikana akanatekereza uruhare rwe mu kubaka u Rwanda rwasenywe n'ibitekerezo bibi, kugirango abantu babashe kongera kubaka Igihugu cyiza. Yongeyeho ko hifuzwa ko ihuriro ry'ubumwe n'ubwiyunge ryakongerwamo imbaraga ku rwego rw'umudugudu

Nyuma y'ikiganiro abitabiriye bunguranye ibitekerezo ndetse biyemeza gufata iya mbere mu gusobanurira abaturage iyi gahunda.

Ku gicamunsi PS muri Minaloc ari hamwe n’abayobozi b’Akarere bungirije ndetse n’abajyanama mu Nama Njyanama barangajwe imbere na Perezida wayo bakurikiye umupira w’Ikipe y’Akarere ka Nyamagabe, Amagaju yakiriyemo Kirehe FC.

Uyu mukino wabereye kuri Stade Nyagisenyi warangiye amakipe yombi anganyije ubusa ku busa.