Mu gihe gahunda yo kurandura ubukene no guteza imbere imibereho myiza y’abaturage ikomeje gushyirwamo imbaraga, Umuryango BRAC uragaragaza uruhare rufatika mu kuzamura abakobwa n’abagore bo mu Murenge wa Kaduha.

Kuri uyu wa 11 Gashyantare 2026, Umuyobozi w’Akarere, Bwana Hildebrand NIYOMWUNGERI, yayoboye inama yahuje ubuyobozi bw’Akarere n’itsinda rya BRAC, ryari rije kumurika ibikorwa by’Umushinga BRAC AIM. Uyu mushinga wibanda ku gufasha abakobwa n’abagore bafite hagati y’imyaka 12 na 35, ubaha amahirwe yo kwiyubaka no kwigira.

Mu bikorwa byawo, BRAC AIM ifasha abakobwa gukomeza amashuri, kubabumbira mu matsinda abafasha kungurana ibitekerezo no kubaka icyizere, ndetse no kuborohereza kubona igishoro cyo gutangira cyangwa kwagura imishinga iciriritse. Ibi byose bigamije kubafasha kwinjira mu rugendo rwo kwiteza imbere no kwigobotora ubukene.

Mu Karere, uyu mushinga umaze kugaragaza impinduka zifatika, aho bamwe mu bagenerwabikorwa bamaze gutangiza ibikorwa bibinjiriza amafaranga, abandi bakaba barasubiye mu mashuri cyangwa bongereye ubumenyi bubafasha kwiteza imbere.

Mu ijambo rye, Meya NIYOMWUNGERI yashimiye Umuryango BRAC ku ruhare ugira mu kuzamura imibereho y’abaturage, by’umwihariko abagore n’urubyiruko. Yagize ati: “Iyo dushyize hamwe, tugahuza imbaraga n’imishinga itandukanye, tugera ku ntego yo kuvana umuturage mu bukene vuba kandi mu buryo burambye.”

Yanagaragaje ko ari ngombwa ko ibikorwa bya BRAC—birimo BRAC UPGI, BRAC AIM na BRAC Microfinance—birushaho guhuzwa kugira ngo ingaruka nziza zigere kuri benshi.

Iyi nama yasize ishimangira ko ubufatanye hagati y’Akarere n’abafatanyabikorwa ari inkingi ikomeye mu kubaka iterambere rirambye, aho umukobwa n’umugore bahabwa umwanya wo kuba ku isonga mu mpinduka ziganisha ku mibereho myiza y’umuryango n’Igihugu muri rusange.