Kuri uyu wa 20 Ugushyingo 2023, Umuyobozi w' Akarere Wungirije Ushinzwe Iterambere ry' Ubukungu Bwana Thadée HABIMANA ari kumwe n' Uwungirije Ushinzwe Imibereho Myiza y' Abaturage Madame Agnès UWAMARIYA bagiranye ibiganiro n' Ubuyobozi bw' Umushinga Compassion International mu Karere ka Nyaruguru n’ aka Nyamagabe byibanze ku kuzamura imibereho y’ Abaturage b’ Akarere ka Nyamagabe by’ umwihariko iy’ abana bafashwa n’ uyu Mushinga.

Umuyobozi wa Compassion International mu Karere ka Nyamagabe Pasteur ZIMURINDA Emmanuel yagaragaje bimwe mu bikorwa uyu Mushinga ukorera muri aka Karere birimo ibyo kurihira abana Amashuri no kwishyurira Abaturage Umusanzu w’ Ubwisungane mu Kwivuza(MUSA) ndetse n’ ibyo uteganya gukora muri iyi minsi mu rwego rwo kuzamura imibereho y’ Abaturage birimo kugabira inka abatishoboye, guha abahinzi ifumbire n’ ibindi.

Muri iyi nama yari yitabiriwe n’ Abanyamabanga Nshingwabikorwa b' Imirenge igize Akarere, Abanyamadini n' Amatorera batandukanye n' abandi, Umuyobozi wa Compassion International mu Karere ka Nyamagabe yasabye ubufatanye bw’ Akarere mu kurushaho kuzamura imibereho y’ Abaturage.

Umuyobozi w’ Akarere Wungirije Ushinzwe Iterambere ry’ Ubukungu Bwana Thadée HABIMANA yashimiye Umushinga wa Compassion International ku bwo ubufatanye udahwema kugaragariza Akarere mu kuzamura imibereho y’ Umuturage.

Umuyobozi w’ Akarere Wungirije Ushinzwe Imibereho Myiza y' Abaturage Madame Agnès UWAMARIYA we yasabye Ubuyobozi bwa Compassion International n’ Abanyamadini n’ Amatorero gufasha Akarere kuzamura imyumvire y’ Abaturage cyane cyane mu kubakangurira kugira isuku kuko bari muri bamwe mu bantu bumvwa cyane kurusha abandi.

Umushinga wa Compassion International ntufasha Abaturage ubaha ibintu bifatika gusa, kuko unabaha amahugurwa atandukanye abashishikariza kwihangira imirimo, ayo kwirinda amakimbirane mu miryango n’ ayandi.