Kuri uyu wa 14 Ukuboza 2023, Umuyobozi w' Akarere Wungirije Ushinzwe Imibereho Myiza y' Abaturage Madame Agnès UWAMARIYA yifatanyije n' Abarimu bigisha mu Bigo by' Amashuri byo mu Murenge wa Uwinkingi mu kwizihiza Umunsi Mpuzamahanga w’ Umwarimu.

 Ibi birori byabereye mu Ishuri Nderabarezi rya TTC Mater Dei Mbuga byaranzwe ahanini no gushima. Dushimimana Fabien, Umwarimu wavuze mu izina rya bagenzi be yashimye Leta y' u Rwanda yabazamuriye umushahara. Yaragize ati: “Turashima Leta yacu yadutekerejeho ikatuzamurira umushahara. Ni ukuri byatweretse ko Mwarimu yitaweho. Umuyobozi w' Akarere Wungirije Ushinzwe Imibereho Myiza y' Abaturage Madame Agnès UWAMARIYA yashimiye Abarimu bo muri uyu Murenge ku ruhare bagize mu gutuma uza mu yatsindishije neza mu Karere, mu bizamini bya Leta bisoza Umwaka w' Amashuri wa 2022-2023. Umunsi Mpuzamahanga w’ Umwarimu, wizihijwe no mu yindi Mirenge igize Akarere.

Mu birori byo kwizihiza uyu Munsi Mpuzamahanga w’ Umwarimu ku rwego rw’ Igihugu wabereye mu Karere ka Gasabo, Abarimu n' Abayobozi bo mu Bigo by' Amashuri 3 byo mu Karere ari byo GSNDP Cyanika, PSSJP II Gikongoro na Uwinkingi TSS barahembwe ndetse n’ Ibigo ubwabyo birahembwa bitewe no gutsindisha neza mu bizamini bya Leta bisoza umwaka w’ Amashuri wa 2022-2023. Uwinkingi TSS yahembwe nk' Ikigo cy' Amashuri cyabaye icya 1 mu Gihugu mu Mashuri ya TSS, PSSJP II Gikongoro ihembwa nk' Ishuri ryabaye irya 2 mu Bigo bicumbikira abana mu Burezi Rusange. PSSJP II Gikongoro kandi ryahembwe nk' iryabaye irya 4 mu bizamini bisoza Ikiciro Rusange, mu Bigo bicumbikira abana. GSNDP Cyanika ryo ryahembwe nk' Ishuri ryabaye irya 3 mu Mashuri y’ Imyuga n’ Ubumenyingiro acumbikira abana. Buri wese yahawe Telephone igezweho (Smart Phone) n' Ibigo bihembwa by' umwihariko.