Kuri uyu wa 19 Ugushyingo 2024, Guverineri w’Intara y’Amajyepfo, Madame Alice KAYITESI yifatanyije n’abaturage b’Akarere by’umwihariko abo mu Murenge wa Gasaka, mu kwizihiza Umunsi Mpuzamahanga w'Ubwiherero ku rwego rw'Igihugu wari ufite insanganyamatsiko igira iti: “Umusarani uboneye, ahantu h'umutuzo”. 

Guverineri KAYITESI yasabye buri wese kwita ku bwiherero nk'uko yita ku ho arara no ku mubiri we. By’umwihariko yasabye Imboni z'Isuku n'Isukura zizakorana n'Ikigo cy'Isuku n'Isukura cya Nyamagabe cyafunguwe ku mugaragaro kuri uyu munsi, kwita ku guhugura abaturage mu rwego rwo kugira ngo bagire ubwiherero bwujuje ibisabwa. 

Umuyobozi w'Akarere Wungirije Ushinzwe Iterambere ry'Ubukungu, Bwana Thaddée HABIMANA yashimiye abafatanyabikorwa b'Akarere batandukanye mu bijyanye n'isuku n'isukura ku ruhare rwabo mu kubungabunga ubuzima bw'abaturage.

Yavuze ko nubwo hari byinshi byakozwe mu guteza imbere isuku n'isukura mu Karere, uruhare rwabo rugikenewe. Yizeje ko Akarere katazahwema gushyira imbaraga mu gufasha abaturage mu bijyanye n'isuku n'isukura.

Umunsi Mpuzamahanga w'Ubwiherero wizihirijwe ku rwego rw'Igihugu mu Karere, wahujwe kandi no gutangiza ku mugaragaro gahunda y'Umudugudu w'Icyitegererezo mu bikorwa by'Isuku n'Isukura. Iki gikorwa cyatangirijwe mu Mudugudu wa Nyabivumu, mu Kagari ka Nyabivumu, mu Murenge wa Gasaka.