Kuri uyu wa 15 Ukwakira 2024, Minisitiri w’Uburinganire n’Iterambere ry’Umuryango, Honorable UWIMANA Consolée yifatanyije n’abaturage b’Akarere by’umwihariko ab’Umurenge wa Gatare, mu birori byo kwizihiza Umunsi Mpuzamahanga w'Umugore wo mu Cyaro ku rwego rw'igihugu wari ufite insanganyamatsiko igira iti:"Ibidukikije, Ubuzima bwacu."

 Umuyobozi w’Akarere, Bwana Hildebrand NIYOMWUNGERI yavuze ko uyu munsi ari uwo kwishimira ibyagezweho mu Karere bishyigikira umugore wo mu cyaro mu kumuha ubushobozi bwo guhangana n’imihindagurikire y’ikirere kandi arengera ibidukikije. Yasabye abagabo gufatanya n'abagore babo mu mirimo kandi bagashyigikira ko umugore atera imbere. Yaragize ati: “Bagabo mufatanye n’abagore banyu mu mirimo kandi mubashyigikire batere imbere kuko iyo umugore ateye imbere n’umuryango uba uteye imbere.”

Yasabye kandi buri wese kurwanya amakimbirane yo mu muryango; ubuharike n'ubushoreke kuko bigira ingaruka mbi ku bana no ku muryango muri rusange. By’umwihariko yasabye abagore kwitabira amasomo mu ishuri ryigisha ibijyanye n’ubuhinzi bugezweho riherereye mu Murenge wabo.

Minisitiri w’Uburinganire n’Iterambere ry’Umuryango, Honorable UWIMANA Consolée yavuze ko kwizihiza Umunsi Mpuzamahanga w'Umugore wo mu Cyaro ari umwanya wo gutekereza ku gaciro k'umugore wo mu cyaro; imbogamizi ahura nazo n'uko zavanwaho.

By'umwihariko yasabye buri wese kurwanya amakimbirane yo mu miryango; ubuharike n'ubushoreke. Mu kwizihiza Umunsi Mpuzamahanga w’Umugore wo mu Cyaro, abagore bo mu Murenge wa Gatare beretse abashyitsi ibyo bakora mu rwego rwo kwiteza imbere.

Kuri uyu munsi imiryango 5 yahawe inka; imiryango 70 ihabwa amashyiga arondereza ibicanwa; imiryango 50 ihabwa ibigega bifata amazi mu gihe amatsinda 38 agizwe n’abagabo 171 n’abagore 969 yahawe miliyoni 20 z’amafaranga y’u Rwanda azabafasha gukomeza kwiteza imbere.