Kuva kuri uyu wa 07 kugeza kuri uyu wa 08 Gashyantare 2024, Umunyamabanga Uhoraho muri Minisiteri y’Ibikorwa by’Ubutabazi Philippe HABINSHUTI ari kumwe n’abahagarariye Abaterankunga b’Umushinga “Jya Mbere” barimo Banki y’Isi n’abandi bari mu ruzinduko rw’iminsi 2 mu Karere.

Uru ruzinduko rwari rugamije kureba uko ibikorwa by’uyu Mushinga ugamije kwegereza Impunzi n'Abanyarwanda serivisi z'ibanze zibafasha mu iterambere, koroherezwa gukorana n'Ibigo by'Imari n'ibindi mu Turere dufite Inkambi z'Impunzi bifasha abo bigenewe.

Umuyobozi w’Akarere Bwana Hildebrand NIYOMWUNGERI wabakiriye yavuze ko uyu Mushinga wa Jya Mbere wagize uruharere rukomeye mu kuzamura imibereho y’Impunzi zo mu Nkambi ya Kigeme n’iy’Abanyarwanda bturanye na yo.

Yagize ati: “Binyuze muri uyu Mushinga wa Jya Mbere, Impunzi zo mu Nkambi ya #Kigeme zisaga 140 zatse inguzanyo zibasha kwiteza imbere, izindi na zo zifashishije ubutaka zatijwe n'Akarere ziteza imbere binyuze mu buhinzi zifatanyamo n'Abanyarwanda baturanye n'iyi Nkambi.”

Ikindi kandi bitewe n’ibyumba by’Amashuri byubatswe binyuze muri uyu Mushinga, ireme ry’uburezi ryarazamutse cyane mu Karere kacu, dore ko Ibigo by’Amashuri byubatswemo ibi byumba byajemu byatsindishije neza mu bizamini bya Leta bisoza umwaka wa 2020-2023. Turabizeza ko ko inkunga Akarere kazabona mu kiciro cya 2 cy'Umushinga “Jya Mbere” na yo tuzayikoresha neza mu rwego rwo gukomeza kuzamura imibereho y'Impunzi n'Abanyarwanda baturanye nazo.

Binyuze muri uyu mushinga “Jya Mbere” ushyirwa mu bikorwa na Minisiteri y’Ibikorwa by’Ubutabazi ku nkunga ya Banki y’Isi, kuva mu mpera z'Ukwakira 2019, mu Karere hubatswe ibyumba by'Amashuri 73 n'ubwiherero 146 mu Bigo by'Amashuri 9, Umuyoboro w'Amazi wa 23 Km n'Isoko ry'Amatungo rya Ryarubondo.