Kuri uyu wa 03 Ugushyingo 2023, Abakozi n’ Abikorera bo mu Murenge wa Gasaka ubarizwamo igice cy’ Umujyi wa Nyamagabe bakoreye urugendoshuri mu Murenge wa Ndora na wo ubarizwamo igice cy’ Umujyi w’ Akarere ka Gisagara mu rwego rwo kuwigiraho igikorwa cyo komeka amakaro ku nzu z’ ubucuruzi ziherereye mu isanteri ya Ndora.

Hashize iminsi itari mike, abafite inzu zikora ku muhanda wa kaburimbo mu Karere ka Nyamagabe basabwe gushyira amapave cyangwa se isima y’ igiheri ku mbuga zazo.

Umurenge wa Gasaka ubarizwamo Umujyi wa Nyamagabe ukaba ari na wo ufite inzu nyinshi zikora kuri kaburimbo na wo ntiwatanzwe muri iki gikorwa.

Nubwo abafite inzu zikora kuri kaburimbo mu Murenge wa Gasaka hafi ya bose bamaze gusoza iki gikorwa, Ubuyobozi bw’ Umurenge buvuga ko ibi bidahagije mu kurimbisha Umujyi wa Nyamagabe.

Ni muri urwo rwego buri kumwe na bamwe mu Bikorera ndetse na bamwe mu bafite inzu zikora kuri kaburimbo, Ubuyobozi bw’ uyu Murenge bwakoreye urugendoshuri mu Murenge wa Ndora wo mu Karere ka Gisagara washishikarije abafite inzu mu isanteri y’ ubucuruzi ya Ndora kuzomekaho amakaro mu rwego rwo kurushaho kuyirimbisha.

Nyuma yo guhabwa ikaze no kwakirwa n’ Ubuyobozi bw’ uyu Murenge, batemberejwe muri iyi santeri ya Ndora aho bihereye amaso ibikorwa byo komeka amakaro ku nzu z’ ubucuruzi ubu Buyobozi buvuga ko bitamaze amezi arenze abiri kuva ba nyiri izi nzu babishishikarijwe.

Umuyobozi w’ Akarere ka Gisagara Jérôme RUTABURINGOGA yashimiye Ubuyobozi bw’ Akarere ka Nyamagabe by’ umwihariko ubw’ Umurenge wa Gasaka, bwahisemo gutoranya abagomba gukorera urugendoshuri mu Karere ayoboye ndetse na we abusezeranya ko bidatinze hari ibyo abo muri aka Karere bazaza kwigira ku ka Nyamagabe.

Umunyamabanga Nshingwabikorwa w’ Umurenge wa Gasaka, FURAHA Guillaume wari uyoboye iri tsinda yashimiye Ubuyobozi bw’ Akarere ka Gisagara by’ umwihariko ubw’ Umurenge wa Ndora ku bwo urugwiro bwabakiranye, anabwizeza ko ibyo bigeye muri uru rugendoshuri bagiye kubisangiza bagenzi babo basize.