Kuri uyu wa 06 Ukwakira 2023, Umuyobozi w' Akarere Wungirije Ushinzwe Iterambere ry' Ubukungu Bwana Thadée HABIMANA ari kumwe n' Uwungirije Ushinzwe Imibereho Myiza y' Abaturage Agnès UWAMARIYA n' abagize Komite y’ Inama y' Umutekano itaguye bakiriye Umuvunyi Wungirije Ushinzwe gukumira no kurwanya akarengane Madame YANKURIJE Odette wari uri mu ruzinduko mu Karere.

Uru ruzinduko rwari rugamije gusuzuma aho ibibazo Urwego rw' Umuvunyi ku bufatanye n' Akarere bakiriye muri Gahunda yo Gukumira no Kurwanya Akarengane yabereye mu Karere kuva ku wa 12/12/2022 kugeza ku wa 15/12/2022 byari bigeze bikemuka.

Mu bibazo 105 byashyikirijwe Akarere, ibigera kuri 56 bingana na 53,5% byarakemutse, 37 bingana na 35,2% biracyakurikiranwa mu gihe ibigera kuri 12 bingana na 11,5% byo bikeneye ubuvugizi.

Bumwe mu buryo Akarere kashyizeho mu kwita ku bibazo byabajijwe Urwego rw’ Umuvunyi burimo Ukwezi kwahariwe kwakira no gukemura ibibazo by’ Abaturage, Umurongo wa Telephone utishyurwa (3201), gushyiraho Urwego rw’ Ubutabera, Ubwiyunge, Amategeko n’ Umutekano ruhuza Inzego z’ Ubushinjacyaha, MAJ, ukuriye Abavoka, Legal Advisor w’ Akarere n’ Umuyobozi w’ Ishami ry’ Imiyoborere Myiza mu Karere, Polisi, RIB na RCS, Inteko z’ Abaturage, Umugoroba w’ Umuryango, Umunsi wahariwe kwakira ibibazo by’ Abaturage ku Karere n’ ubundi bunyuranye.