Kuri uyu wa 12 Kamena 2023, ubwo yatangizaga icyumweru cyahariwe kwita ku mubyeyi n'umwana, Umuyobozi w' Akarere ka Nyamagabe Hildebrand NIYOMWUNGERI yasabye abagabo kudatererana abagore babo mu kwita ku bana babarinda igwingira.

Mayor Hildebrand NIYOMWUNGERI yaragize ati:" Umwana ni umugisha, akaba umugisha usendereye iyo yitaweho ntajye mu mirire mibi cyangwa igwingira." Iki cyumweru cyahariwe kwita ku buzima bw' umwana n' umubyeyi cyari gifite insanganyamatsiko igira iti:" Umwana utagwingiye ni ishema ry' ababyeyi."

Kugeza ubu imibare yo mu mwaka wa 2020 yerekana ko mu karere ka Nyamagabe habarurwa abana bari ku ijanisha rya 33.6% bafite igwingira. Ubuyobozi bw' akarere buvuga ko bufite intego y' uko mu mwaka wa 2024 iri janisha rizaba riri kuri 19%. Mu cyumweru cy’ umubyeyi n’ umwana hatanzwe serivisi z’ ubuzima zinyuranye zirimo iyo guha abana ibinini bya Vitamine A, iyo kubaha indyo yuzuye ndetse n' iyo uha ibinini by' inzoka ku ngeri zose.