Kuri uyu wa 21 Nyakanga 2023, Ishuri Ribanza rya SOS- Gikongoro ni bwo ryakoze ibirori byo gusoza Umwaka w’ Amashuri wa 2022-20223, aho Umuyobozi w’ Akarere ka Nyamagabe Hildebrand NIYOMWUNGERI wari Umushyitsi Mukuru yashimye ubuhanga abana biga muri iri shuri bagaragaje.

Uyu muhango waranzwe n’ ibikorwa binyuranye by’ Abanyeshuri baryigamo n’ abarisojemo.

Ni ibikorwa ahanini byibanze ku bumenyi bakura hanze y’ amasomo.

Mu rwego rwo guteza imbere Uburezi n’ Ururimi rw’ Icyongereza, Umuyobozi w’ Akarere ka Nyamagabe Hildebrand NIYOMWUNGERI n’ itsinda yari ayoboye bahuriye mu kiganirompaka n’ abanyeshuri ba SOS- Gikongoro ku nsanganyamatsiko igira iti: “Ese ababyeyi baba bagira uruhare mu gutsindwa kw’ abana babo?”

Mu ijambo rye Umuyobozi w’ Akarere ka Nyamagabe Hildebrand NIYOMWUNGERI yashimiye ubuhanga aba bana bagaragaje ndetse n’ ubw’ Abanyeshuri bo muri SOS-Gikongoro muri rusange badahwema kugaragaza.

Yaragize ati: “Mbere na mbere nagira ngo nsabe ababyeyi muri hano mushimire aba bana ba SOS. Aba bana batsinda 100%. Ntabwo ari ugutsinda bimwe bisanzwe, ahubwo ni ugutsinda bimwe by’ Indashyikirwa hamwe babona amabaruwa abajyana mu Bigo byigwamo n’ Indashyikirwa. Icyo ni ikintu cyiza, twishimira mu karere ka Nyamagabe.

Mayor Hildebrand NIYOMWUNGERI kandi yibukije abana biga mu Ishuri Ribanza rya SOS- Gikongoro ko umuntu Isi ikeneye muri iki gihe atari uzi imibare n’ ibindi yiga mu ishuri gusa.

Yagize ati: “Isi aho igeze, ikeneye umuntu utazi imibare, kuvuga Icyongereza n’ Igifaransa gusa. Isi aho igeze uyu umunsi ikeneye uzi gukora byinshi nyuma ya byinshi mwiga mu Ishuri. Ni aha rero mbonera ko ibyo batweretse, ibyo bakora, ibyo Abarezi babatoza, muri gushyiraho cya kitegererezo natwe tugomba kureba tukakijyana mu yandi mashuri.”

Ishuri Ribanza rya SOS Gikongoro kugeza ubu ryigamo 484, muri bo 42 bakoze ibizamini bisoza Amashuri Abanza uyu mwaka.

Imyaka 2 irashize, abanyeshuri basoza Amashuri abanza muri iri shuri batsinda 100%. Ubuyobozi bwaryo bukavuga ko nubwo batsinda bose, ubu intego ihari ari iy’ uko bagomba kuzajya batsinda bose baje mu kiciro cya Mbere.