Kuri uyu wa 13 Nzeri 2023, Umuyobozi w’ Akarere Wungirije Ushinzwe Imibereho Myiza y’ Abaturage mu Karere ka Nyamagabe Madame Agnès UWAMARIYA yayoboye Inama Mpuzabikorwa ya Isange One Stop Center (IOSC) yarebeye hamwe uko ibikorwa byo mu gihembwe cya mbere birimo icyo gufasha gusubira mu buzima busanzwe abahohotewe byagenze n' uko ibibazo byaba bikigaragara muri IOSC byakemuka n' ibindi.

Abakozi bashinzwe kurwanya ihohotera rishingiye ku gitsina muri Isange One Stop Center zo ku Bitaro bya Kigeme na Kaduha bishimiye ko ibibazo bari bagaragaje mu nama yabanje byakemutse, bakaba bizeye ko n’ ibisigaye birimo kuba ahakirirwa abahohotewe hadahagije, na byo bizabonerwa igisubizo.

Umuyobozi w’ Akarere wungirije Ushinzwe Imibereho Myiza y’ Abaturage mu Karere ka Nyamagabe Madame Agnès UWAMARIYA yasabye abashinzwe kwita ku bahohotewe kubakurikirana kugeza bahawe ubutabera.

Bumwe mu bufasha buhabwa uwahuye n’ ihohotera rishingiye ku gitsina harimo guhabwa imiti imurinda kwandura indwara zandurira mu mibonano mpuzabitsina nka SIDA, kumuha imiti imurinda gusama iyo ari uw’ igitsinagore, kumuha ubuvuzi, kuganirizwa, guhabwa amafunguro, kumufasha kongera gusubizwa mu buzima busanzwe no kumukurikirana.

Inama Mpuzabikorwa ya Isange One Stop Center iba rimwe mu gihembwe ihuza Umuyobozi w’ Akarere Wungirije Ushinzwe Imibereho Myiza akaba ari na we muyobozi wa yo, Umuyobozi cyangwa Abayobozi b’ Ibitaro IOSC ikoreramo, Umuyobozi wa RIB mu Karere, Umuyobozi wa Polisi mu Karere, Umuyobozi wa MAJ mu Karere, Umukozi ushinzwe Uburinganire n’ Ubwuzuzanye mu Karere, Umukozi ushinzwe kurwanya ihohotera rishingiye ku gitisina, Umugenzacyaha ukorera muri IOSC n’ Umuganga w’ indwara zo mu mutwe( Psychologist) ukorera muri IOSC.

Iyi nama iba rimwe mu gihembwe.