Kuri uyu wa 20 Nzeri 2024, Umuyobozi w'Akarere Wungirije Ushinzwe Iterambere ry'Ubukungu, Bwana Thaddée HABIMANA yakiriye Umuyobozi Mukuru wa Yalla Yalla Group, Bwana NDAYIZIGIYE Emmanuel baganira ku kongera imbaraga mu bufatanye mu buhinzi.

Mbere yo kwakirwa na Visi Meya HABIMANA, Umuyobozi Mukuru wa Yalla Yalla Group ari kumwe n’itsinda yari ayoboye babanje gusura Koperative Ingenzi za Kamegeri ikorera ubuhinzi mu gishanga cya Mwogo giherereye mu Murenge wa Kamegeri.

Yashimye uburyo abanyamuryango b’iyi Koperative babyaza umusaruro iki gishanga. By’umwihariko yashimye uburyo mu gihe cy’impeshyi bakibyaje umusaruro mu buhinzi bw’imboga bafashijwemo na Yalla Yalla Group. Abahinzi batewe inkunga y’ibikoresho bigezweho byo gutera imiti irwanya indwara n’ibyonnyi, banagenerwa abakozi b’impuguke babafasha mu kubungabunga ibikorwaremezo byo kuhira.

Mu mpeshyi y’uyu mwaka wa 2024, ni bwo ku nshuro ya mbere abanyamuryango ba Koperative Ingenzi za Kamegeri bahinze mu gishanga cya Mwogo imboga ku buso bungana na hegitari 6. Kuri ubu aba bahinzi barishimira umusaruro bakuye muri ubu buhinzi bw’imboga. Mukazamazimpaka Mérène umwe muri aba bahinzi avuga ko amafaranga yakuye mu mboga yahinze muri iki gishanga mu gihe cy’impeshyi yamugiriye akamaro gakomeye.