Umuyobozi w'Akarere Wungirije Ushinzwe Imibereho Myiza y'Abaturage, Madame Agnès UWAMARIYA yifatanyije n’Ibitaro by’Akarere bya Kigeme mu muhango wo kwibuka ku nshuro ya 31 Jenoside yakorewe Abatutsi mu 1994, asaba abayobozi n’abakozi babyo kwirinda ingengabitekerezo ya Jenoside aho bakorera n’ahandi ahari ho hose.

Kuri uyu wa 22 Gicurasi 2025, ni bwo mu Bitaro by’Akarere bya Kigeme, hibutswe ku nshuro ya 31, abakozi, abarwayi n’abandi bazize Jenoside yakorewe Abatutsi mu 1994 biciwe muri ibi Bitaro.

Uyu muhango wabanjirijwe no kunamira imibiri y'abazize Jenoside yakorewe Abatutsi mu 1994 isaga ibihumbi 50 iruhukiye mu Rwibutso rwa Jenoside rwa Murambi no gushyira indabo ku Kimenyetso cy’amateka ya Jenoside kiri muri ibi Bitaro.

Visi Meya, UWAMARIYA wari Umushyitsi Mukuru muri uyu muhango, yasabye abakozi n’abayobozi b’Ibitaro bya Kigeme kurwanya ingengabitekerezo ya Jenoside aho bakorera n’ahandi hose.

Yasabye kandi abafite amakuru y'ahari imibiri y'abazize Jenoside yakorewe Abatutsi mu 1994 biciwe muri ibi Bitaro itarashyingurwa mu cyubahiro kuyatanga, nayo igashyingurwa.