Kuri uyu wa 20 Mata 2025, ni bwo imibiri y’abazize Jenoside yakorewe Abatutsi mu 1994 yari iruhukiye mu Rwibutso rwa Jenoside rwa Nyamigina ruherereye mu Murenge wa Tare isaga ibihumbi 4, yimuriwe mu Rwibutso rwa Jenoside rwa Murambi ruherereye mu Murenge wa Gasaka.

Umuyobozi w’Akarere, Bwana Hildebrand NIYOMWUNGERI yavuze ko uru Rwibutso rwa Jenoside rwa Nyamigina rwimuriwe mu rwa Murambi muri gahunda yo guhuza Inzibutso za Jenoside hagamijwe kurushaho kubungabunga amateka ya Jenoside yakorewe Abatutsi mu 1994.

Yashimiye abafite ababo bari baruhukiye muri uru Rwibutso rwa Jenoside rwa Nyamigina bemeye ko imibiri yabo yimurwa, abizaza ko ruzakomeza kuba ikimenyetso cy’amateka.

Yagize ati: “Turabashimira ko mwemeye ko Urwibutso rwanyu ruhuzwa n’urwa Murambi. Turabizeza ko uru Rwibutso rwa Jenoside rwa Nyamigina ruzakomeza kubungwabungwa nk’ikimenyetso cy’amateka.”

Kwimura imibiri y’abazize Jenoside yakorewe Abatutsi mu 1994 yari uruhukiye mu Rwibutso rwa Jenoside rwa Nyamigina ijyanwa ku Rwibutso rwa Jenoside rwa Murambi, byakurikiwe n’Umugoroba w’Ikiriyo wabereye kuri uru Rwibutso.

Ni igikorwa cyitabiriwe na Perezida w’Inama Njyanama y’Akarere, Madame Clotilde UWAMAHORO, Umuyobozi w’Akarere Wungirije Ushinzwe Iterambere ry’Ubukungu, Bwana Thaddée HABIMANA wanatanze ikiganiro kuri Jenoside yakorewe Abatutsi mu 1994, isomo ku Banyarwanda, ku mahanga n'ibihugu byo mu Karere, Umuyobozi w’Akarere Wungirije Ushinzwe Imibereho Myiza y’Abaturage, Madame Agnès UWAMARIYA, abagize Inama y’Umutekano Itaguye y’Akarere, abahagarariye amadini n’amatorero n’abandi.

Imibiri y’abazize Jenoside yakorewe Abatutsi mu 1994 ingana na 4201, ni yo yimuwe mu Rwibutso rwa Jenoside yakorewe Abatutsi rwa Nyamigina.

Irashyinguranwa mu cyubahiro kuri uyu wa 21 Mata 2024 mu Rwibutso rwa Jenoside rwa Murambi n’indi 7 yari ishyinguye mu miryango ndetse n’undi umwe wabonetse.