Abadepite bagize Komisiyo y’Ububanyi n’Amahanga, Ubutwererane n’Umutekano basuye Akarere ka Nyamagabe

Kuri uyu wa 27 Ukwakira 2026, Umuyobozi w’Akarere ka Nyamagabe, Bwana Hildebrand NIYOMWUNGERI, ari kumwe n’abagize Inama y’Umutekano Itaguye y’Akarere, yakiriye intumwa z’Abadepite bagize Komisiyo y’Ububanyi n’Amahanga, Ubutwererane n’Umutekano, ziyobowe na Hon. NTEZIMANA Jean Claude.

Aba Badepite basuye Akarere ka Nyamagabe nk’akarere gacumbikiye impunzi, bagamije gusuzuma iyubahirizwa ry’amategeko n’amasezerano mpuzamahanga yerekeye uburenganzira bw’impunzi ziri mu nkambi n’abasaba ubuhungiro bari mu bigo by’agateganyo (Transit Centres).

Banagamije gukurikirana ishyirwa mu bikorwa ry’Umushinga wa Socio-Economic Inclusion of Refugees and Host Communities (SEIRHC)-JYA MBERE, ugamije guteza imbere imibereho n’ubukungu by’impunzi n’abaturage bazakiriye, kugira ngo bose babashe kwiteza imbere.

Mu kiganiro cyabanje, ubuyobozi bw’Akarere bwagaragarije izo ntumwa uko impunzi ziri mu Nkambi ya Kigeme zifashijwe kwinjira mu buzima bw’abaturage bazakiriye, kwitabira ibikorwa by’iterambere no kwishakamo ibisubizo bibafasha kwigira no kwiteza imbere.

Nyuma y’ibiganiro, Abadepite basuye Inkambi ya Kigeme, bagirana ibiganiro n’impunzi kugira ngo bumve uko zibayeho, bamenye ibyagezweho mu kuzifasha ndetse n’imbogamizi zigihari.

Uru ruzinduko rwari rugamije kureba uko amategeko n’amasezerano yerekeye impunzi yubahirizwa, no gukurikirana ingamba zishyirwa mu bikorwa mu guteza imbere imibereho y’impunzi n’abaturage bazakiriye, hashingiwe ku ihame ryo kubana neza no kwiteza imbere bafatanyije.