Nyamagabe: Hakozwe Isuzuma ry’Ibikorwa byo Kwibuka ku Nshuro ya 32 Jenoside yakorewe Abatutsi mu 1994

Ku wa 27 Nyakanga 2026, Umuyobozi w’Akarere ka Nyamagabe Wungirije Ushinzwe Imibereho Myiza y’Abaturage, Madame Agnès UWAMARIYA, ari kumwe n’abagize Inama y’Umutekano Itaguye y’Akarere hamwe na Komite ya IBUKA mu Karere, yayoboye inama yo kurebera hamwe uko ibikorwa byo Kwibuka ku nshuro ya 32 Jenoside yakorewe Abatutsi mu 1994 byagenze.

Iyi nama yibanze ku isuzuma ry’imigendekere y’ibikorwa byo Kwibuka byabaye hirya no hino mu Karere, hagamijwe kureba ibyagenze neza n’ibikwiye gukomeza kunozwa mu bihe biri imbere.

Abitabiriye inama baganiriye ku bikorwa byakozwe mu gushyigikira Abarokotse Jenoside yakorewe Abatutsi mu 1994 batishoboye, harimo ubufasha bwatanzwe mu mibereho yabo ya buri munsi ndetse n’uburyo bakomeje kwegerwa no gufashwa.

Hanarebwe kandi ibikorwa byo gushyingura imibiri mu cyubahiro, hagamijwe gukomeza guha agaciro abazize Jenoside no kubungabunga amateka yayo.

Inama yagarutse ku kibazo cy’ihungabana ryagaragaye mu gihe cyo Kwibuka, hanasuzumwa uburyo bwakoreshejwe mu gufasha abarigaragaje no gukomeza kubaba hafi.

Abitabiriye inama banaganiriye ku ngengabitekerezo ya Jenoside yagaragaye, bashimangira ko gukomeza kuyirwanya no kuyikumira ari inshingano za buri wese, by’umwihariko binyuze mu bukangurambaga, uburere n’inyigisho zubaka ubumwe bw’Abanyarwanda.

Madame Agnès UWAMARIYA yashimiye inzego zose zagize uruhare mu gutegura no gushyira mu bikorwa ibikorwa byo Kwibuka, asaba ko ubufatanye bukomeza kugira ngo amateka Jenoside yakorewe Abatutsi mu 1994 atazibagirana kandi Jenoside itazongera kubaho ukundi mu Rwanda.